DILI, 06 outubru 2021 (TATOLI)—Diretór Sentru Dezenvolvimentu Komunitáriu (CDC, sigla portugés) Baucau, Vicente Matos Belo, informa sentru ne’e hala’o ona abertura ba formasaun movel iha sukuu haat ba benefisiáriu na’in–160 iha munisípiu Baucau.
Notísia Relevante: Semana oin, CDC sei realiza formasaun movel iha Baucau
“Iha ami–nia formasaun movel dadauk ne’e ami hahú halo ona abertura iha loron 04 outubru iha suku Samalari no Uailili. Iha loron 05 outubru, ami halo abertura ba iha suku Gariuai iha aldeia Uatu-Ua no Suku Loilubo iha postu administrativu Vemasse nian. Daudaun ne’e, ami–nia formasaun la’o hela,” Vicente Matos Belo hateten ba Agência Tatoli, via telefónika, kuarta ne’e.
Iha formasaun movel ne’e, kada suku ida ho durasaun loron 15 no formasaun ne’e maneja tuir ninia matéria iha oráriu ne’ebé CDC estabelese ona ba iha formadór sira, hodi fasilita formasaun iha suku sira-ne’e.
Bainhira formasaun movel ne’e konklui, CDC hamutuk ho Dirasaun Nasionál Formasaun Profisionál hosi SEFOPE sei kontinua halo monitorizasaun no sei akompaña grupu hirak ne’e durante fulan tolu, hahú hosi fulan dezembru 2021 to’o janeiru no fevereiru 2022.
Iha formasaun movel ne’e, formandu sira sei aprende kona–bá oinsá sira bele hatene maneja rai, viveiru, kompos (adubu), lideransa, post kolleta, marketing no book keeping.
Formasaun movel ne’e hahú iha loron 04 to’o 21 fulan-outubru 2021, ne’ebé hala’o iha suku Samalari, Uailili no suku Gariuai iha postu administrativu Baucau Vila no suku Loilubo iha postu administrativu Vemase.
Benefisiáriu ba formasaun movel ne’e hamutuk 160, ne’ebé kompostu hosi feto 57 no mane 103.
Jornalista : Nelia Fernandes
Editór : Cancio Ximenes
