Boa sorte vs Santa Cruz. Imajen Tatoli//Hortencio Sanchez

DILI, 06 outubru 2021 (TATOLI) – Ekipa Boa Sorte FC iha duni “sorte di’ak” bainhira hala’o nia jornada 13 kontra ekipa Santa Cruz FC hatudu duni prova hodi defende pontu tolu iha tabela klasifikasaun provizóriu hodi la entrega de’it ba Santa Cruz.

Rezultadu di’ak rezulta ba Boa Sorte hafoin halakon nia adversáriu Santa Cruz iha jogu kontinuasaun Pra Liga Futsal Timor – Leste ne’ebé hala’o iha kampu futsal FALINTIL-Forsa Defeza Timor – Leste (F-FDTL) Fatuhada Dili, kuarta kalan ne’e.

Jogu ne’ebé dirije hosi árbitru primeiru Emencio Levio, árbitru segundu Retilio Luiz no árbitru rezerva Aldino Trindade la’o iha ámbitu haksolok tanba anima tebes hosi adeptu  ekipa rua nian.

Bainhira jogu hahú no ekipa rua halo ona kontra ho atake ba malu sente kampo futsal ne’e atu rahun de’it tanba lian maka’as hosi adeptu sira hodi fó esperansa maka’as ba jogadór sanolu hosi ekipa rua ne’e.

Jogu komesa la’o manas liután halo jogadór hirak ne’e tenke serbisu maka’as, liki kosar iha kampu laran tuir karakter jogu ida-idak nian.

Maibé, oportunidade di’ak monu uluk ba Boa Sorte nia liman nune’e iha minutu ualu, Jogadór Salvadór Saldanha lansa uluk ona golu primeiru hodi hatuur rezultadu ba 1-0.  Golu ne’e la fó impaktu ba Santa Cruz hodi hatudu nia jogu atu bele responde golu ne’ebé akontese ona ba sira.

Serbisu hirak ne’ebé jogadór Santa Cruz halo la saugati de’it tanba iha minutu 12 Jogadór Aurio da Costa responde kedan hodi halo jogu ne’e empata ba 1-1.

Sutu ne’ebé Aurio lansa, nia velosidade maka’as tebes halo guarda-rede Boa Sorte, José Lopes labele salva no hamriik hateke de’it.

Haree ba rezultadu nune’e, adeptu sira mós la nonok nafatin hakilar makas hodi fó apoiu nafatin. La kole. La baruk. Hein vitória husi sira-nia ekipa favoritu. Maski fatin be sira hamrik ba la seguru no la merese atu sira bele horik atu fó apoiu ba sira nia ekipa favoritu.

Jogadór sira be’e iha kampu laran hala’o jogu mós la nonok hakilar ba malu hodi pintas bola ba mai atu buka se los mak hatama tan golu. Bola kabuar duir aan husi ain ida ba ain seluk, tuir esforsu no tékniku jogadór entre ekipa rua. Besik ona minutu ne’ebé atu termina primeira parte iha minutu 19 oportunidade di’ak akontese fali ba Santa Cruz liuhosi nia jogadór Marcelo Lucas pintas bola hosi kampu klaran ba to’o rede Boa Sorte nia oin. Bainhira to’o rede Boa Sorte Marcelo tenke pintas tan guarda rede José Lopes no hatama bola ba rede laran rezultadu nakfilak kedan ba 2-1.

Tanba minutu primeira parte tenke termina ona árbitru sira tenke hú ona arbitu prittt..prittt… hatudu liman ba kampu laran hodi jogu termina Santa Cruz mak provizóriu vitória.

Maibé, realidade hatudu oinseluk bainhira hakur ba segunda parte Santa Cruz labele ona marka tan golu tanba estratéjia Boa Sorte nian muda totál la hanesan ona jogu primeira parte. Hosi ne’e kedan Santa Cruz tenke falla totál iha nia jogu.

Nune’e oportunidade di’ak akontese kedan ba Boa Sorte liu hosi tékniku no tatika foun ne’ebé treinadór Fufo Amaral  halo.

Mudansa ne’e la hela de’it hanesan mudansa tanba iha minutu 23 Zeferino Alves hatudu duni nia kapasidade jogu hodi fura tan rede Santa Cruz hodi muda kedan rezultadu ba 2-2.

Hosi golu ne’e Santa Cruz laiha kedan lian no hatudu jogu la dun sólidu ona iha kampu laran entre sira ho sira. Hosi pontu fraku hirak ne’e Boa Sorte aproveita di’ak oportunidade nune’e iha minutu 28 Ronelio Xavier hatama tan golu ida hodi hatur rezultadu ba 3-1 halo Santa Cruz nia jogadór sira nervozu maka’as. Nune’e iha minutu 39 jogadór Santa Cruz Jilson Reis obrigadu tenke simu kartaun mean hosi árbitru hodi hapara kedan nia labele partisipa tan jogu ne’e.

Hare ba Jilson haksumik an ona hosi kampo laran hela de’it jogadór na’in haat. Boa Sorte jere kedan oportunidade ne’e hodi fó konfiansa ba jogadór Ronelio Xavier hodi prodús tan golu ida hatur metin kedan rezultadu ba 4-2 iha minute 39.

Hosi golu ne’e mak termina ekipa rua nia luta no vitória monu ba Boa Sorte nia liman no Santa Cruz tenke fila ho 0. Boa sorte iha sorte duni iha jogu ohin kalan.

Eskuad Boa Sorte

José Lopes (14). Julianto Soares (12). Zeferino Alves (27). Ronelio Xavier (21) no Salvadór Saldanha (24).

Eskuad Santa Cruz

Jufer Silva (1). Domingos Pinto (93).Francisco Berdato (22). Marcelino Silva (7). Jilson Reis (10).

Jornalista: Hortencio Sanchez

Editór: Rafy Belo

 

PUBLISIDADEiklan

HAKEREK NO HATÁN

Please enter your comment!
Please enter your name here