Profesora ida halo akompañamentu ba estudante Ensinu Báziku Canossa, segunda (20/09). Imajen TATOLI/António Gonçalves

DILI, 05 outubru 2021 (TATOLI)—Sindikatu Profesór iha Timor-Leste (SPTL) husu ba Governu liuhosi Ministériu Edukasaun Juventude no Desportu (MEJD) fó tratamentu dignu ba profesór atu kontribui ba kualidade edukasaun iha rai-laran.

“Ami rekomenda ba MEJD hodi hadi’a saláriu profesór sira, hela fatin, no serbisu fatin atu fó tratamentu dignu ba profesór sira atubele garante kualidade edukasaun,” Prezidente SPTL, Francisco Fernandes, hateten ba Agência TATOLI, iha ninia knaar fatin, tersa ne’e.

Sindikatu hato’o lia hirak ne’e relasiona ho loron mundiál ba profesór sira kada tinan selebra iha loron 05 outubru, ho baze ba rekomendasaun International Labour Organization (ILO)/United Nations Educational, Scientific and Cultural Organization (UNESCO) iha tinan 1966, kona-ba estatutu profesór, padraun direitu no responsablidade mestra no mestre sira-nian.

Enkuantu, selebrasaun loron mundiál ba profesór iha tinan ne’e ho tema ‘Teachers at the heart of education recovery’.

“Ita hasoru pandemia globál, ne’ebé la konsege selebra maibé ami kontinua ezije ba Governu atu trata distinu profesór sira ho dignu,” nia dehan.

SPTL konsidera atu garante kualidade edukasaun profesór sira, presiza iha kondisaun di’ak no eskola sira tenke iha fasilidade di’ak ba profesór no estudante sira.

“Edukasaun iha Timor-Leste atu hetan kualidade di’ak, pilar importante ida maka kuríkulu Timor-Leste tenke hadi’a atubele korresponde ba situasaun no tuir kondisaun rai-laran,” nia akresenta.

Iha fatin ketak, Diretór Eskola Ensinu Sekundáriu 4 setembru Balide, Sérgio da Cruz, hateten, papél profesór nian kauze ema barak la konsidera, maski profesór mak forma ema.

“Ami profesór nu’udar masin ba ema hotu tanba iha papél importante, maibé ema barak la konsidera. Profesór mak forma ema sai ema, nune’e ha’u husu ba Ministériu Edukasaun atu kria kondisaun ida di’ak ba profesór sira,” nia sujere.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here