Diretora Jerál Ministériu Agrikultura no Peska (MAP), Maria Odete do Céu Guterres. Imajen TATOLI/Egas Cristóvão

DILI, 05 outubru 2021 (TATOLI)—Diretora Jerál Ministériu Agrikultura no Peska (MAP), Maria Odete do Céu Guterres, otimista produsaun agríkola iha rai-laran sufisiente ba subsídiu mensál ai-han lokál ba funsionáriu sira.

“Ami ne’ebé serbisu iha área ida-ne’e téknikamente ami otimista tanba ita-nia dadus hatudu ona ema (funsionáriu) ida,  kada fulan simu foos kilograma 35, ita konta ba funsionáriu hamutuk 30.000, kada fulan ita presiza tonelada 1.000-resin no konta ba tinan ida presiza tonelada 12.600,” Diretora Jerál ne’e hateten iha ninia knaar fatin, Comoro, tersa ne’e. 

Notísia relevante: Governu kria subsídiu mensál transporte ba funsionáriu administrasaun públika

Iha tinan 2021, MAP nota produsaun agríkola liuliu foos iha rai-laran hamutuk tonelada 72.000, ne’ebé prodús iha natar Maliana I, Maliana II, Uatulari no fatin seluk, hamutuk ektare 80.000, ho sistema irrigasaun boot sia, maibé kada tinan foin uza natar ektare 30.000.

Nune’e, Governu liuhosi MAP nia polítika atu mantein hasa’e produsaun, halo diversifikasaun produtu, espansaun ba área potensiál no aplika teknolojia produsaun.

Iha tinan kotuk, MAP mós halo ona demostrasaun iha kanál irrigasaun sia, ne’ebé kada irrigasaun hetan ektare 40, kada tinan bele kontribui produsaun tonelada 16. Enkuantu tinan ne’e aumenta ektare 40 ba kanál irrigasaun iha área produtividade. 

“Ita-nia dezafiu maka mudansa klimátika tanba bele halo esforsu boot, maibé udan tun bele estraga kanál irrigasaun no bele hamenus produsaun,” Diretora Odete akresenta.

Governu kria subsídiu mensál ai-han produtu agríkola nasionál ba funsionáriu públiku ho objetivu atu hamenus despeza akizasaun ai-han no konfesaun refeisaun sira no iha tempu hanesan promove akizasaun produtu agríkola hosi produtór nasionál inklui insentiva aumenta produtividade agrikultór.

Kada fulan funsionáriu públiku sira iha direitu ba foos kilograma 35, batar kilograma lima, koto kilograma lima, fore-mungu kilograma lima no fore-keli kilograma rua, ne’ebé produtu hirak ne’e sei entrega ba benefisáriu iha kada fulan-tolu.

“Ami garante ba implementasaun polítika Governu hodi fó subsídiu alimentár ba funsionáriu sira tanba tuir duni polítika ministériu nia atu hasa’e produsaun,” nia garante.

Diretora Jerál ne’e konsidera polítika VIII Governu Konsitusionál ne’e bele motiva agrikultór sira atu hasa’e produsaun iha rai-laran. 

Jornalista : Natalino Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here