Ministru Fidelis Magalhães. Imajen Tatoli//Sérgio da Cruz

BOBONARO, 05 outubru 2021 (TATOLI)-Reprezentante Grupu Agrikultór munisípiu Bobonaro, Casimiro Soares, preokupa ho pagamentu Sentru Lojístika Nasionál (CLN, sigla portugés) ne’ebé tarde.

Relasiona ho preokupasaun ne’e, Ministru prezidensiál Konsellu-Ministru, Fidelis Manuel Leite Magalhães, iha ámbitu kampaña nasionál vasinasaun, hatan dehan sei aprezenta iha reuniaun Konsellu Ministru (KM).

“Iha fulan hirak liubá ekipa ida hosi nasionál konsege mai hasoru direita ko’alia ho ami maibé sira mai ko’alia dehan tanba burokrasia mak pagamentu tarde. Entaun, ha’u dehan ba sira, ami agrikultór sira la haree ba ida ne’e. Ami presiza mak sosa tiha tenke fó kedas osan. Se ami hein mak ida ne’e (pagamentu) bele mate hamlaha,” Reprezentante agrikultór, Casimiro Soares hato’o iha suku Holsa, Postu administrativu Maliana, munisípiu Bobonaro, tersa ne’e.

Ministru Fidelis Magalhães garante hodi hatan: “Ita-boot sira-nia prekupasaun ha’u anota hela. Ha’u sei ba Dili, aban, reuniaun Konsellu-ministru, ha’u sei aprezenta ba Ministru Ekonomia para bele buka Solusaun”.

Entretantu, antes ne’e, tuir Reprezentante Grupu Agrikultór munisípiu Bobonaro Casimiro Soares, CLN sosa haree-kulit hamutuk tonelada 466 hosi agrikultor Bobonaro inklui mós agrikultór balun hosi postu administrativu Zumalai, munisípiu Covalima.

Maibé tuir nia to’o oras ne’e CLN seidauk halo pagamentu tanba ne’e husu aselera pagamentu nune’e sira bele sustenta fali nesesidade uma-laran no oan sira nia eskola.

Iha parte seluk, dadaun ne’e haree kulit tonelada 466 ne’e sei iha hela aramazen CLN, iha Holsa Maliana no seidauk halo prosesamentu sai foos.

Notísia relevante:CLN aloka ona osan atu sosa hare-kulit

Jornalista: Sérgio da Cruz

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here