Administradór munisípiu Lautém, Domingos Sávio. Imajen TATOLI/Natalino Belo

LAUTÉM, 05 outubru 2021 (TATOLI)—Administradór munisípiu Lautém, Domingos Sávio, informa, Prezidente Parlamentu Nasionál (PPN), Aniceto Guterres, hamutuk ho membru Governu na’in-tolu sei halo kampaña vasinasaun iha munisípiu Lautém.

“Bainrua (07/10) Prezidente Parlamentu Nasionál mai iha ne’e no ha’u hetan ona kontaktu atu halo oráriu sosializasaun kona-ba kampaña vasinasaun,” Autoridade ne’e informa ba Agência TATOLI, iha suku Parlamentu, tersa ne’e.

Governante na’in-tolu ne’ebé sei halo kampaña vasinasaun faze daruak, kompostu hosi Vise-Ministru Turizmu, Komérsiu no Industria (MTKI), Domingos Lopes Antunes, Sekretária Estadu Igualdade no Inkluzaun (SEII), Maria José da Fonseca Monteiro de Jesus no Sekretáriu Estadu Komisaun Sosiál (SEKOMS), Merício Juvinal dos Reis ‘Akara’.

Tuir Administradór, postu ne’ebé iha taxa partisipasaun kampaña vasinasaun a’as mak Luro, Iliomar no Tutuala, enkuantu, iha postu Lospalos no Lautém, númeru partisipasaun komunidade iha kampaña vasinasaun kiik, tanba ne’e iha semana rua sei hasa’e, nune’e bele atinje meta 75%.

“Agora daudaun iha taxa partisipasaun 40%, hosi totál komunidade 500.000,” nia akresenta.

Nune’e, autoridade ne’e apela ba komunidade Lautém atu hakbesik-an ba postu saúde atu simu vasina no husu autoridade lokál atu esforsu-an organiza no halibur komunidade sira, nune’e labele tauk no dúvida simu vasina.

“Ho prezensa membru Governu sira iha munisípiu Lautém bele fó ona esplikasaun di’ak ba komunidade sira atu hakbesik-an ba simu vasinasaun,” nia hatutan.

Tuir dadus nasionál, komunidade ne’ebé vasina ona doze dahuluk iha munisípiu Lautém atinje ona 51,2%, enkuantu kompleta ona vasina 26,7%, hosi totál komunidade 500.000 resin.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here