Ministru prezidénsia Konsellu-ministru, Fidelis Manuel Leite Magalhães lansa kampaña nasionál vasinasaun, iha suku Holsa, postu administrativu Maliana, munisípiu Bobonaro. Imajen Tatoli//Sergio da Cruz

“Informasaun  ohin ministru partilla mai ne’e kasu kedas lia-bosok ne’ebé ami fiar tanba ne’e mak ohin ha’u deside simu vasina dahuluk para bele asegura ha’u-nia saúde hosi Covid-19”

BOBONARO, 05 outubru 2021 (TATOLI)-Ministru prezidénsia Konsellu-ministru, Fidelis Manuel Leite Magalhães enkoraja komunidade suku Holsa postu administrativu Maliana, munisípiu Bobonaro, simu vsina hodi aumenta imunidade isin  hodi luta kombate kontajia Covid-19.

“Bainhira moras Covid-19 alastra maka’as mai ita. Ita Timór nia sistema saúde seidauk preparadu atu atende pasiente hotu iha sala izolamentu. Entaun, dalan úniku mak komunidade hotu tenki simu vasina para bele hasa’e ita-nia imunidade isin hodi proteze an hosi Covid-19,” Nia enkoraja

Ezekutivu ne’e haktuir, Governu deside oferese vasina ba komunidade tanba Organizasaun Mundiál Saúde (OMS) rekomenda katak vasina tipu AstraZeneca seguru no la estraga ema nia sistema saúde iha isin-lolon.

Nune’e iha situasaun pandemia globál Covid-19, Governu uza vasina atu salva sidadaun nia vida la’ós ho intensaun  atu estraga ninia komunidade.

“Ai-moruk ida agora ita uza ne’e, péritu hosi nasaun dezenvolvidu sira dezeña epesifikamente atu kontra virus Coroan ho kualker variante. Ne’eduni, ha’u  husu ba komunidade labele ta’uk atu simu vasina tanba ai-moruk ne’e antes ema fó mai ita  halo uluk teste iha laboratóriu ho teknolojia moderna ne’ebe bele proteze ita hosi moras at ne’e,” Nia esplika

Haree ba persentajen vasina iha munisípiu Bobonaro sei menus, Governante ne’e mós konsiensializa komunidade suku Holsa, atu labele fiar liu informasaun Hoax (bosok) ne’ebé ema iresponsável lansa iha media sosiál “Komunidade, di’ak liu ita fiar informasaun kredivel hosi Ministériu Saúde tanba sira mk hatene liu kona-ba importánsia hosi vasina. Se ita naran fiar ema arbiru, moras ne’e bele fó périgu ba ita no ita-nia familia tomak,” Nia dehan

Ikusliu, Ministru prezidénsia Konsellu-ministru, Fidelis Manuel Leite Magalhães, hanesan mós Bobonaro-oan, husu ba Komunidade suku Holsa atu mantein kumpre protokolu saúde hanesan uza máskara, fase-liman bebeik ho sabaun no halo distánsia sosiál nune’e bele ajuda governu mitiga no elimina inimigu invizivel pesti Covid-19 iha Timor-Leste.

Iha fatin hanesan, Xefe Suku Holsa, António Santa Cruz informa katak nia populasaun hosi idade 18 ba leten ho komorblidade ne’ebé elizibel atu simu vasina AstraZeneca hamutuk 3.007.

“Ha’u-nia komunidadade na’in 1.087 simu ona doze dahuluk, na’in 313 mak kompleta ona doze hosi númeru ne’e. Na’in 1.920 mak seidauk simu vasina,” Autoridade lokál ne’e haktuir.

Autoridade lokál ne’e mós promete ba oin sei esforsu serbisu hamutuk ho serbisu Saúde munisipál Bobonaro atu tuun direita ba fahe informasaun iha aldeia neen iha suku Holsa nune’e bele komvense Populasaun sira mai simu vasina hodi bele atinje meta Governu katak Populasaun Timor-leste tenke simu hotu vasina.

António Santa Cruz agradese mós ba inistru prezidénsia Konsellu-ministru tanba ho prezensa membru governu nian ne’e, komunidade hamutuk 83 mak voluntariamente mai simu vasina, iha lansamentu kampaña vasinasaun iha sede Suku Holsa.

Entretantu, Komunidade João Baptista agradese ba inisiativa Governu ne’ebé lansa kampaña nasionál vainasaun COVID-19 mai to’o suku tanba liuhusi programa ne’e mak komunidade bele rona direita informasaun kredivel hosi Governu.

“Informasaun  ohin ministru partilla mai ne’e kasu kedas lia-bosok ne’ebé ami fiar tanba ne’e mak ohin ha’u deside simu vasina dahuluk para bele asegura ha’u-nia saúde hosi Covid-19,” Komunidade ne’e dehan.

Nia fó-sasin, hafoin simu vasina, nia senti kondisaun normál hanesan babain tanba ne’e kompromete sei ba fahe fali informasaun ba nia familia no komunidade atu mai simu vasina.

Tuir dadus ne’ebé Ministeriu Saúde rejista iha loron 04 outubru, persentazen populasaun munisípiu Bobonaro ne’ebé simu ona vasina doze primeiru 43,2% no doze kompletu 17,0%.

Enkuantu haree ba persentazen kobertura vasinasaun iha Munisipiu Bobonaro sei Menus. Primeiru-ministru liuhosi reuniaun Konsellu-ministru orienta membru Governu na’in ha’at halo kampaña vasinasaun ba komunidade iha nivel suku to’o aldeia nune’e bele konsola populasaun sira simu hotu vasina Covid-19.

Membru Governu na’in ha’at ne’e mak hanesan, Ministru prezidénsia Konsellu-ministru, Fidelis Manuel Leite Magalhaes responsável ba iha Postu administrativu Maliana no Lolotoe, Ministru Ensinu superiór siénsia no kultura, Longuinhos dos Santos responsável ba Postu administrativu Cailaco.

Ministru agrikultura no peska, Pedro dos Reis, responsável postu administrativu Balibo no Atabae, no Ministru edukasaun juventude no desportu, Armindo Maia, responsável ba postu administrativu Bobonaro durante semana rua.

Jornalista: Sérgio da Cruz

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here