Espoza Prezidente da Republika, Cidalia Mozinho. Imajen Tatoli/Egas Cristóvão.

DILI, 04 outubru 2021 (TATOLI)-Espoza Prezidente Repúblika atuál Embaixadora ba Organizasaun Plan Internasionál iha Timor-Leste, Cidália Lopez Nobre Mouzinho Guterres enkoraja ba labarik feto Timoroan sira atu sai ajente ba mudansa pozitivu.

“Ha’u enkoraja ba labarik feto iha Timor-Leste atu sai ajente ne’ebé mudansa ba pozitivu,  dahuluk tenke kuidadu aan rasik, no kuidadu vida nune’e imi luta ba mehi sira ne’ebé imi mehi no prioridade ba saida de’it mak imi atu halo maibé ho prioridade ne’ebé pozitivu,” nia hateten iha salaun João Paulo, Comoro Dili, segunda ne’e.

Notísia Relevante :Labarik Feto Sira Saudável Tenke Hapara Kaben Sedu

Siénsia maka dalan ba feto no labarik feto sira atu halo mudansa ba moris, tanbe ne’e presiza aprende barak liután liuhosi edukasaun formal no naun formal nune’e bele kapasita aan hodi partisipa iha prosesu dezenvolvimentu.

Cidália dehan feto no labarik feto sira presiza atensaun bainhira utiliza mídia sosiál hanesan facebook seluk tan tanba dala barak akontese asédiu seksuál, violasaun no esplorasaun hasoru feto Timor-Leste tanba utiliza mídia sosiál ne’ebé laloos.

“Tanba ne’e bainhihra ita uza la ho kuidadu ita rasik sei hamonu ita aan rasik nune’e ita tenke forsa hosi hili buat ne’ebé pozitivu iha mídia sosiál, nune’e inan-aman iha dever foti desizaun lae ba oan sira bainhihra la’o sala, tanba ita hadomi oan la’os ho domin de’it maibé oinsá uza domin hodi regula oan sira sai di’ak,” Espoza Xefe Estadu ne’e hateten.

Iha biban hanesan, Reprezentante labarik feto husi Eskola Bázika Sentrál Daisoli Munisípiu Aileu,Claudia Ximenes, hateten labarik feto barak maka hetan defamasaun iha mídia sosiál.

“Ami enkoraja Governu no entidade hotu atu foti asaun ba ida ne’e, tanba kada loron ami haré informasaun bosok no estereótipu influénsia ami no ami nia hahalok, tanba video no imajen hetan manipulasaun barak no hatuun ami. Iha mos faktu falsu kona-ba vasina COVID-19 iha Timor-Leste ho informasaun falsu sira ne’e halo ami dúvida ho ami nia poténsia,” nia dehan.

Komisária Diretu Labarik, Dinorah Granadeiro, hateten presiza fó formasaun ba feto no labarik feto sira kona-ba maneira uza mídia sosiál  ne’ebé los no seguru nune’e bele evita violénsia no diskriminasaun kontra feto no labarik feto.

“Ita mós sei halo advokasia ba Governu oinsá regula informasaun ida ne’ebé propriu ba labarik sira bele uza,” nia hateten.

Nune’e Reprezentante Grupu Mulher Parlamentar Timor-Leste, Deputada Elvina Sousa, hateten Governu iha papel importante atu asegura feto no labarik feto hasoru esplorasaun no violasaun oioin.

Notísia Relevante :Labarik feto 14.000 mak hetan asédiu seksuál iha mídia sosiál

Jornalista: Arminda Fonseca

Editór:  Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here