Jogu femenina Bobonaro,Ekipa rua lansa hela kontra ataka ba malu,Diabun FC roupa (Metan kahur kinur) no Faomahon FC roupa (Azul),tersa (05/10),imagen Tatoli/Sérgio da Cruz

BOBONARO, 05 outubru 2021 (TATOLI)-Jogu femenina Bobonaro époka 2021 Diabun FC hakat ba faze finál hafoin halakon Faomahon ho rezultadu 1:0,iha kampu futebol Maliana, tersa ne’e.

Iha ínisiu jogu ekipa rua lansa kontra no ataka ba malu ho ida-idak nia ritmu jogu. Famahon domina uluk jogu ho modelu ofensivu no halo kedas ameasa ba guarda-rede Diabun FC iha minutu 12, maibé la konsege akontese golu ruma, maski ekipa tenta atu prodús golu ba malu maibé esforsu sira ne’e la atinje objetivu to’o arbitru deside hakotu jogu primeiru parte.

Iha faze daruak, jogu foin la’o de’it minutu ida, defeza Faomahon FC hamonu jogadór avansada Diabun FC iha área risku,no arbritu deside fó-penalidade maibé oportunidade osan-mean ne’e Jogadora Anabela do Rosario (3) la konsege ezekuta ho susesu tanba bola ba loos de’it guarda-rede nia liman. Rezultadu fallansu ne’e motiva  Faomahon FC halo ataka maka’as iha liña oin hodi fó mós presaun ba Guarda-rede adversáriu, maibé la konsege tanba defeza Diabun metin liu iha liña kotuk.

Ambiente jogu kontinua manas liután. Tanba ne’e, adeptu hosi ekipa rua ne’e haklalak hodi apoiua sira-nia ekipa atu prodús golu malu, maibé  oportunidade monu tan fali ba Diabun FC liuhosi Jogadora avansada Saunzinha dos Santos (6); susesu fura uluk  golu ida iha minutu 52 hodi muda rezultadu ba 1:0.

Ho rezultadu provizóriu ne’e halo Diabun FC mós hasa’e tan ritmu jogu liuhosi jogadora Saunzinha dos Santos (6) halo defeza Faomahon atrapalla ho ninia tékniku individuál ne’ebe mai ho tensaun atu produz golu,maibe eforsu hirak ne’e la konsege atinje nia alvu,tamba defeza Faomahon FC susesu hamate nia jogu.

Jogu la’o tan minutu balun maibé la akontese tan golu ruma to’o arbirtu deside hakotu jogu segunda parte, hodi fó-vitória ba Diabun FC hakat ba faze finál, enkuantu Faomahon FC sei iha oportunidade atu hadau terseiru lugar.

Treinadór Diabun FC, Agapito da Purificação sente kontenti ho rezultadu vitória ne’ebé nia ekipa hatudu.

“Ha’u kontente tebes tanba durante jogu, ha’u-nia ekipa sempre manan,maibe ida ne’e ami sei halo tan preparasaun di’ak kona-ba téknika,disiplina para ami jogu, iha finál, ami bele sai kampeaun iha jogu femenina Bobonaro époka 2021,” Nia otimista.

Nia hateten durante Jogu ekipa Diabun FC foin derrota dala ida hasoru Cavalo Fronteira, tanba ne’e maski mai hosi postu administrativu Atabae ho distánsia dook maibé nia otimisita, jogadór sira sei kampeaun.

Jogu ne’e lidera hosi Arbritu lokál, Marcal Baptista, asistente primeiru João Assis no asistente segundu Olívio Vicente arbritu sira hetan ona formasaun hosi FFTL liuhosi departamentu arbritazen nasionál ho sertifikadu nível báziku.

Tuir oráriu hosi Asosiasaun Futebol Bobonaro (AFB), aban Tuku 4:00 Cavalo Fronteira sei jogu kontra Manu Aman FC. Entre ekipa rua ne’e ida, ida ne’ebé manan sei jogu kontra Diabun FC hodi hadau títulu kampeaun, no derota sei kontra Faomahon FC hodi hadau terseiru lugar.

Jornalista: Sérgio da Cruz

Editor: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here