DILI, 05 outubru 2021 (TATOLI)–Governu liuhosi Ministru Finansa, Rui Augusto Gomes, tersa ne’e aprezenta segmentasaun Fundu Petrolíferu (FP) ba Parlamentu Nasionál.

Rui Augusto Gomes aprezenta segmentasaun Fundu Petrolíferu ne’e ho tópiku haat kompostu hosi enkuadramentu fiskál orijinál no estratéjia investimentu, dezáfiu sira, segmentasaun Fundu hodi jere risku investimentu no materiál suplementár.

Enkuadramentu fiskál orijinál no estratéjia investimentu

Ministru Finansa, Rui Gomes esplika enkuadramentu fiskál orijinál no estratéjia investimentu liuhosi enkuadramentu fundu permanente ho objetivu rua, ida finánsia despeza Governu, rua halo poupansa ba jerasaun future sira.

Nune’e mós haktuir abordajen rendimentu permanente, levantamentu limita ba de’it retornu reál esperadu ka sei hetan hosi investimentu. RSE maka 3% entaun estratéjia investimentu permanente ho alokasaun 40% iha asaun (equities) opta hodi hetan retornu reál 3%.

Modelu ida-ne’e prezerva valór reál hosi SWF no fó perfil levantamentu hanesan uniforme hodi fó benefísiu ba jerasaun atuál no futuru sira. Nune’e, sei rezulta iha futuru ida sustentável ba tempu naruk nomoos ekidade interjenerasionál.

Dezáfiu sira

Timor-Leste hasoru dezáfiu tanba levantamentu fundu minarai iha orsamentu kada tinan fiskál aas-liu Rendimentu Sustentável Estimadu (RSE). Levantamentu aas-liu RSE kada tinan dezde 2009, ho médiu 5% hosi rikusoin minarai (petroleum wealth) no 8% hosi fundu.

Governante ne’e haktuir, médiu levantamentu dezde 2009 maka millaun $984 no biliaun $1,032 iha tinan 5 kotuk nia laran, no levantamentu entre 2018-2020 kiik ka tún tanba iha situasaun polítiku no aplikasaun rejime duodesimál.

Nune’e mós levantamentu aprovadu ba 2021 mak aas-liu ona (kompara ho tinan sira seluk) intermu rikusoin minarai.

Tanba ne’e retornu investimentu esperadu sei ki’ik ka tún tanba retornu realizadu besik ho objetivu retornu reál 3%. Dezde inísiu, retornu investimentu mak 4.94% p.a (por ano) ka 2.86% p.a hafoin hasai tiha inflasaun Estadu Unida Amérika (EUA) nian.

Maibé, retornu esperadu agora ki’ik ka tún tanba taxa de juro globál ne’ebé kiik loos. Konforme konsultór independente ida, retornu esperadu nominál ba tinan 10 tuir mai hosi alokasaun 35% iha asaun maka 2.5% de’it. Iha kazu ida-ne’e, RSE loloos maka 0.5% ka millaun 95 hosi fundu biliaun $19.

Nia fó-sai katak, reseita minarai tún no besik atu hotu ona tanba reseita hosi mina gás piku iha 2012 no reseita minarai iha futuru maizumenus millaun $200.

“Previzaun ida-ne’e la inklui Greater Sunrise ka kampu potensiál sira seluk. Kondisaun atuál halo potensiál hirak-ne’e nia momentu (timing) no valór inserteza,” nia akresenta.

Maibé, nia dehan, fundu sa’e iha tempu reseita minarai aas tanba reseita minarai mak taka diferensa entre levantamentu no retornu investimentu nune’e fundu kontinua sa’e. Ne’e kauza hosi balansu fundu planaltu ka tetuk dezde reseita tún maka’as iha tinan 2014-2015.  Valór fundu sa’e iha tinan 2019 no 2020 fefleta levantamentu ki’ik no retornu investimentu aas (liu médiu).

Ministru Rui Gomes halo previzaun katak, fundu projetadu sei tún iha tinan sira tuir mai ne’e tanba reseita minarai iha futuru ki’ik (presu mina no produsaun tún), retornu invesimentu ne’ebé inserteza no levantamentu boot ka aas, hamosu dúvida kona-bá fundu nia sustentabilidade ba tempu naruk.

“Balansu fundu sei tún tanba levantamentu boot liu retornu investimentu aumenta ho reseita minarai. Nune’e, presiza iha mudansa estratéjia investimentu hodi jere risku iha Fundu Petrolíferu nia investimentu,” nia dehan.

Segmentasaun fundu hodi jere risku investimentu

Ministru Finansa argumenta, atu jere risku ne’e tenke liuhosi asaun ne’ebé presiza orizonte tempu ida naruk, katak asaun iha posibilidade aas atu hetan lakon ka perda iha investimentu ho orizonte badak.

Tanba ne’e presiza orizonte naruk atubele fiar-aan (konfiante) atu hetan retornu aas hosi asaun.

“Hahú 2010, fundu nia alokasaun iha asaun determinadu ho presumsaun katak fundu iha orizonte ida naruk loos. Maibé, estratéjia ida-ne’e presiza halo revizaun ona tanba iha espetasaun ba investimentu boot ka aas no fundu nia finalidade,” nia hateten.

Nia fó ezemplu hosi sekuénsia ba risku, katak sekuénsia ka orden hosi retornu sei la afeta ba valór finál hosi rikusoin (wealth) enkuantu laiha fluxu kaixa sai levantamentu. Maibé sekuénsia hosi retornu ne’e importante iha períodu la’ós-kumulasaun (decumulation).

Iha situasaun aat liu bainhira akontese merkadu asaun monu ka krize iha inísiu. Fa’an asaun iha tempu krize hodi finánsia levantamentu sei realiza (xave) lakon hirak-ne’e, nune’e habadak fundu nia moris.

“Sekuénsia ba risku bele jere ho hamenus risku no kaer de’it karteira likidu, ativu sira ho risku kiik hodi finánsia levantamentu esperadu,” nia hateten. 

Materiál suplementár

Nia fundamenta, materiál suplementár liuhosi enkuadramentu atuál presiza muda tanba enkuadramentu orijinál la serve ona nune’e enkuadramentu foun enkoraza planeamentu fiskál ba periódu tinan tolu nian.

“Fundu nia balansu sei tún. Fundu sei hotu anaunser (a não ser) iha mudansa iha polítika fiskál ka iha reseita minarai boot ka signifikante. Reseita aumenta iha 2019 no 2020 ne’e sorte di’ak hetan retornu aas nomoos limitasaun temporária iha levantamentu, tanba ne’e risku investimentu tenke hamenus imediatamente,” nia esplika.

Atu fó solusaun entaun kada portafóliu tenke iha objetivu klaru nune’e enkuadramentu ho dinámiku no ajusta ho projesaun levantamentu foun sira iha tinan fiskál tuir mai.

Asaun ne’ebé atu fó retornu esperadu aas maibé ho risku ne’ebé aas mós tanba asaun (equity) fó retornu esperadu aas liu duké títulu (bond), maibé ho risku mós aas liu.

Nia haktuir, retornu investimentu fundu petrolíferu liuhosi volatilidade nia retornu sa’e tanba pezu asaun aumenta ne’ebé atinje 40% iha 2014 maibé fundu petrolíferu benefísia hosi retornu asaun ne’ebé di’ak ka aas iha 2019 no 2020.

“Médiu hosi rendimentu ka retornu investimentu kada tinan dezde 2015 maka millaun $956,” nia hateten.

Maske nune’e, Bankada Congresso Nacional de Reconstrução de Timorense (CNRT), Deputada Maria Fernanda lay, hateten Governu tenke informa loloos segmentasaun fundu ne’e ba Parlamentu Nasionál.

“Se iha 2011 ita la diversifika fundu petrolíferu entaun ita-nia osan lato’o hanesan ministru temi biliaun $19 ne’e,” Eis Prezidente Komisaun C (Finansa Públika) ne’e hateten.

Jornalista : Evaristo Soares Martins

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here