Fakuldade Edukasaun Arte Umaniora, Departementu Lian Inglés hosi Universidade Nasional Timor-Lorosa’e. Imajen/UNTL

DILI, 05 outubru 2021 (TATOLI)—Estudante hosi Fakuldade Edukasaun Arte Umaniora (FEAH, sigla portugés), Departementu Lian Inglés hosi Universidade Nasional Timor-Lorosa’e (UNTL) kuaze 80% seidauk domina lian inglés.

Tuir Vise-Dekanu FEAH, Elvis Brites, estudante 80% ne’ebé intregra-an iha Departementu Lian Inglés, koñesimentu ba lian báziku liu.

“Ita hatene momos kapasidade estudante sira tanba ita halo ezame teste ba sira. Realidade sira laiha esforsu atu hasoru barreira no la hatene atu halo saida iha futuru,” Dosente lian ingés ne’e hateten ba Agência TATOLI, iha edifísiu FEAH, Liceu, tersa ne’e.

Estudante rejistradu iha Departementu Lian Inglés UNTL hamutuk na’in-200.

“Maibé na’in-25 de’it maka iha kapasidade, koñesimentu no abilidade bele intende didi’ak matéria sira iha lian inglés maibé restu difisil tebes,” nia akresenta.

Tuir Elvis Brites, Estudante nia level 1 to’o 3 de’it, ne’ebé loloos universidade presiza estudante ne’ebé iha nível 4 ba leten, nune’e bele iha interasaun bainhira dosente hanorin iha sala aula.

“Atu sai ema intelektuál, loloos tenki domina área espesífiku sira, tanba Departamentu Lian Inglés atu prepara estudante sira sai profesór iha futuru, maibé bainhira estudante la hatene ka la domina lian, oinsá nia bele hakerek monografia ka oinsá nia atu hanorin iha futuru. Bainhira estudante ida ramata ninia estudu, tenki fahe fali matenek ba ema seluk. Se agora estudante la bele ko’alia inglés, labele hakerek ho di’ak no labele diskute iha lian inglés oinsá nia atu hakerek monografia,” nia hatutan.

Dosente lian ingés ne’e konsidera, estudante sira tama iha Departamentu Lian Inglés, la’ós kulpa sira-nia, maibé responsabilidade universidade no Ministériu Ensinu Superiór, Siénsia no Kultura (MESSK) atu tau-matan no kria kondisaun.

“Loloos sira tenki hatene didi’ak kapasidade pesoál estudante sira, UNTL nu’udar instituisaun públiku, ne’ebé kada tinan Governu sempre investe ba universidade ne’e, tanba ne’e atu koloka ema tenki hatene didi’ak, se lae bele estraga no hamonu almamater,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here