Diretór EBC Palaban, Vincencio Cono. Imajen Tatoli/Abílio Elo Nini.

OÉ-CUSSE, 05 outubru 2021 (TATOLI)—Diretór Eskola Ensinu Báziku Sentrál (EBC, sigla portugés) Palaban, Vincencio Cono, informa EBC Palaban simu ona osan ba apoiu estudante sira hamutuk $1.578, atu sosa matéria didátika no nesesidade eskola nian hodi prepara ba ezame nasionál, aferisaun no pasajén. 

Notísia Relevante: Autoridade RAEOA aloka $40.799.50 apoiu estudante sira

“Ami simu ona osan apoiu ba estudante sira hamutuk $1.578 hodi hamatan ba estudante sira hamutuk 789 ne’e,” Vincencio Cono informa ba Agência Tatoli iha EBC Palaban, Oé-Cusse, tersa ne’e.

Osan ne’e, Governu apoiu atu fasilita estudante sira ba ensinu aprendizajen hanesan desportu, artistika nomós reparasaun balun.

Apoiu ne’e at fasilita estudante sira-nia estudu di’ak liután inklui matéria didátika hanesan surat-tahan, tinta ba makina impresór, inklui envelope ne’ebé mak sei projeta ba ezame lokál iha tinan ne’e.

Enkontru ho inan-aman diskute kona-bá ezame nasionál

EBC Palaban realiza enkontru ho inan-aman hodi diskute estratejia hasoru ezame nasionál. Imajen/Espesiál.

Atu ezame nasionál ba tinan 2021 ne’e hetan susesu, tersa ne’e (05/10), jerente Eskola Bázika Sentrál Palaban realiza enkontru entre profesór sira ho estudante nia inan-aman hodi diskute estratéjia atu hasoru ezame nasionál ho kualidade.

“Matéria didátika prepara hosi nasionál sensitivu tebes. Tanba ne’e, ami konvida inan-aman sira atu kontribui ideia hodi trasa estratéjia ba inan-aman nia preparasaun hasoru ezame nasionál. Estudante sira-ne’ebé atu partisipa iha ezame nasionál ne’e hamutuk 224,” nia dehan.

Entaun, nia dehan, inan-aman sira-nia prezensa iha enkontru preparasaun ne’e importante tebes, tanba bele loke diskusaun no bele diskuti kona-bá atributu ba ezame nasionál, treinamentu no informa ba inan-aman sira katak órariu internál eskola nian no kontribui kombate COVID-19.

Tanba, órariu internál iha EBC Palaban ne’e mak dadeer estudante tama eskola no meudia mós tama nafatin, ho nune’e sira bele aprende tán rezumu ne’ebé durante ne’e Ministériu Edukasaun Juventude no Desportu (MEJD) elabora ba eskola sira.

“Iha enkontru ne’e, eskola informa ba inan-aman sira liu-liu tratamentu dokumentu estudante sira-nian tanba impaktu ba diploma. Hanesan naran iha sertidaun batizmu no RDTL presiza hadi’a, tanba diploma báziku sei hetan depois ezame nasionál. Ami husu inan-aman sira atu akompaña oan-sira hodi prepara-an at estuda, nune’e bele hasoru ezame nasionál ho susesu,” nia dehan.

Reprezentante inan-aman, Batista Lelan, sujere atu aselera hodi fasilita estudante sira bainhira akontese dezastre ruma iha realizasaun ezame nasionál hanesan moras no dezastre seluk.

Entretantu, totál kandidatu ezame nasionál iha EBC Palaban hamutuk 224, ho totál profesór hamutuk 27 inklui guarda na’in-rua

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here