BTAL vs Becusse United. Imajen//Associação Futsal de Timor-Leste

DILI, 05 outubru 2021 (TATOLI) – Tersa lorokaik ne’e, hafoin loromatan fahe nia roman hodi muda ba nakukun, iha kampo futsal FALINTIL-Forsa Defeza Timor – Leste (F-FDTL) Fatuhada hasoru malu entre klube futeból futsal rua; BTAL FC no Becusse United FC iha jogu kontinuasaun Pra Liga Futsal Timor – Leste jornada 13.

Ekipa rua ne’e hanesan lutadór hodi nune’e sé los mak atu hetan Pontu tolu (3) hodi nakfilak rezultadu iha tabela klasifikasaun provizóriu. Maibé realidade hatudu duni ba ekipa rua nia luta durante minutu 40 iha kampu laran.

Iha ne’ebé ekipa BTL tenke “hakruuk” ba Becusse United tanba forsa la to’o liuhosi golu ne’ebé sira hatama rua (2) de’it no Becusse iha nia jornada prodús hitu (7) nune’e rezultadu tur metin ba 2-7.

Kontra no atake ba malu entre ekipa rua sai ona hanesan kultura iha mundu futeból. Tanba ne’e minutu primeiru hahú ekipa rua hatudu kedan sira-nia jogu liuhosi tátika, tékniku no abilidade hotu sira iha ba malu.

Halai ba mai iha kampu laran entre jogadór na’in 10 hosi ekipa rua hodi buka sé los mak hatama uluk golu. Maibé tekiteki iha minutu 2 de’it Vencesalau Guterres fura ona rede BTAL nian no guarda rede António Carvalho la konsege salva tanba velosidade bola maka’as, nune’e rezultadu muda ba 1-0.

Jogu sai manas liután, maibé ekipa ne’ebé lidera hosi treinadór Joel Adriano Becusse la fó fatin ba adversáriu BTAL atu ameasa rede Becusse ne’ebé guarda hosi Marcos Fatima Guterres.

Haree ba amizade-metin iha kampu laran halo BATL nakdoko ba bebeik to’o minutu 10 Venceslau marka tan golu ida hodi muda rezultadu ba 2-0.

Hosi golu ne’e sadik tebes ekipa BTAL atu servisu maka’as liután, nune’e la monu leet de’it tanba iha minutu 17 jogadór BTAL Natalino Salsinha responde ona golu ida hodi nakfilak rezultadu ba 2-1.

Golu ne’ebé BTAL lansa la hamate unidade ne’ebé Becusse iha tanba kontinua joga ho kalma ka duir bola rai, la halimar bola aas no la ansi halo golu, bainhira jogadór na’in haat (4) sukat sé kuandu seidauk kona iha alvu.

Ho jogu kalma iha kampu laran halo jogadór na’in haat (4) hosi BTAL halai iis araska to’o iha minutu 19 jogadór Becusse Filipe Soares sukat ona bola ne’ebé nia marka kona iha alvu no nia lansa fó duni rezultadu di’ak hodi lori rezultadu ba 3-1.

Hosi Golu ne’e mak termina ona jogu iha primeira parte deskansa minute balu hafoin kontinua ba segunda parte iha minutu 20 nia laran.

Dolar ba parte segundu nafatin iha kontra atake ne’ebé seriu hosi ekipa BTAL hodi fó ameasa guarda rede Marcos Fátima Guterres maibé barak la kona iha alvu no barak mós nia baku sai.

Hosi jogu ho ansi ne’ebé BTAL lansa fasil los ba Becusse hodi hamate sira nia jogu no iha minutu ’22, ’23, jogadór Manuel Fernandes marka golu rua tutuir malu halo nakdoko ekipa BTAL nia fuan no rezultadu mós muda kedan ba 5-1.

Maibé BTAL la nonok de’it kontinua serbisu maka’as to’o iha minute 28 konsege responde tan golu ida ba rede Becusse hodi muda rezultadu ba 5-2 lu hosi jogadór Natalino da Costa.

Jogu lao tiha minute barak ekipa rua la halo tan golu maibé sorte di’ak monu liu ba Becusse tanba iha minutu 37 Venceslau marka tan golu ida hodi muda lalais eskoru ba 6-1. Jogu besik termina ona hela de’it minutu ida jogadór Becusse António Soares utiliza didiak tékniku hodi marka tan golu ida iha minutu 39 ba rede BTAL hodi hatuur metin rezultadu ba 7-2 too jogu termina Vitoria hela ba Becusse.

Jornalista: Hortencio Sanchez

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here