Deputadu Bankada FRETILIN, Francisco Miranda Branco. Imajen Tatoli/Jogerjo Guterres

DILI, 05 outubru 2021 (TATOLI)–Bankada Frente Revolusionária Timor-Leste Independente (FRETILIN) propoin forsa polítika sira halo konsensu nasionál ba setór edukasaun no funsaun públika, nune’e hasa’e osan iha orsamentu kada tinan fiskál.

“Atu haree edukasaun ne’e, kestaun nasionál. Se ita ko’alia kona-bá konsensu nasionál, ida mak ne’e forsa polítika hotu-hotu tenke konsensu nasionál ba edukasaun, funsaun públika, defeza no seguransa nasionál. Ida-ne’e mak ita bele rezolve kestaun edukasaun iha Timor-Leste. Tanba, se lae, ita taka kuak no loke kuak, entaun ita la rezolve buat ida,” Xefe Bankada FRETILIN, Deputadu Francisco Miranda Branco, levanta liuhosi plenária, tersa ne’e.

Nia dehan, tinan 20 liu ona situasaun iha setór edukasaun no funsaun públika laiha mudansa entaun presiza haree fukun hosi impedimentu sira.

Prezidente Parlamentu Nasionál, Deputadu Aniceto Longuinhos Guterres Lopes, esplika lakleur debate ona orsamentu 2022, tanba ne’e husu deputadu sira kontribui ideia konstrutivu.

“Ha’u soe hela ba deputadu sira atu konsidera bá. Aproveita ho restaurasaun tinan 20 ne’e, karik atu muda ita-nia estratéjia entaun ita tenke sériu. Tanba tinan 20 ona, ita situasaun mak hanesan ne’e hela de’it. Ema Indonézia nian 25% hosi Orsamentu Jerál Estadu anuál ne’e, destinadu ba edukasaun. Karik ita mós bele hanoin to’o iha-ne’ebá, entaun Parlamentu Nasionál mak sentru desizaun polítika. Agora, fila-fali ba deputadu sira,” nia fó hanoin ba deputadu sira.

Jornalista : Evaristo Soares Martins

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here