ANCTL-TL divulga informasaun kona-bá impaktu tabaku ba saúde ba joven no estudante RAEOA no motiva joven sira redús fuma tabaku ba futuru saudavél. Imajen Tatoli/Abílio Elo Nini

OÉ-CUSSE, 05 outubru 2021 (TATOLI)—Aliansa Nasionál Kontrolu Tabaku Timor-Leste (ANCTL-TL, sigla portugés), tersa ne’e divulga informasaun kona-bá impaktu tabaku ba saúde hodi motiva joven sira iha RAEOA atu bele redús fuma tabaku no kria sosiedade ne’ebé saudavél iha futuru.

Diretór Ezekutivu ANCT-TL, Sancho Balite Fernandes, hateten atividade ne’e realiza hetan apoiu hosi Sekretáriu Estadu Juventude no Desportu (SEJD) ho objetivu atu hasa’e koñesimentu joven sira-nian kona-bá perigu hosi uza tabaku.

“Tabaku ne’e produtu ida-ne’ebé sai fatór prinsipál ba moras sira la-hada’et hanesan atakasaun fuan, moras kankru, diabetes, hipertensaun, infesaun vias respiratóriu (asma) ne’ebé daudaun ne’e oho ema barakliu,” Diretór ANCT-TL ne’e informa ba Agência Tatoli iha salaun administrasaun Palaban, Oé-Cusse.

Kada tinan, nia informa, rejista ema mate ba moras ne’e 1.000, entan ANCTL-TL hanoin katak atividade ne’e importante atu eduka joven sira, nune’e bele hamenus uza tabaku hodi kria sosiedade ne’ebé saudavél.  

Atividade ne’e, ANCT-TL realiza ho regulármente kada fulan halo kampaña tabaku ba iha munísipiu 12 no RAEOA mak foin hahú, tanba iha tinan 2020 ne’e labele halo tanba situasaun pandemia COVID-19.

Uza tabaku ne’e sai hanesan dezafiu iha nasionál tanba foinsa’e sira barakliu ho númeru sidadaun hotu iha Timor-Leste sei kontinua aas, entaun ANCT-TL sujere ba autoridade RAEOA, autoridade lokál, dirijente igreja presiza halo intervensaun, nune’e bele redús númeru ema fuma tabaku.

Tanba, nia dehan, autoridade hirak ne’e mak iha influénsia no kompeténsia atu enkoraja povu liu-liu foinsa’e Atoni-oan sira atu prevene labele monu ba uza tabaku no droga ruma.

“Ami husu líder sira atu hanoin ona kona-bá jerasaun foun livre hosi tabaku. Katak, joventude sira bandu atu fuma sigaru, labele sosa sigaru, ema boot fuma labele besik sira, joven sira mós tenke hetan tratamentu hapara fuma. Ida-ne’e mak dalan di’akliu, nune’e bele hakotu ona korente uza tabaku iha nasaun ne’e,” nia sujere.

Reprezentante Sekretáriu Rejonál Asuntu Saúde no Responsavél Unidade Kontrolu Moras Não Contasioza, Abrasco Nessi, nia husu joven sira atu kaer metin lema saúde nian katak “Saúde iha Ita-Nia Liman Rasik”.

Profesór Fransisco Seran, hato’o agradesimentu ba ekipa ANCT-TL tanba bele fahe informasaun ba estudante sira, nune’e sira bele komprende efeitu hosi fuma tabaku ne’e.

Entretantu, atividade divulgasaun informasaun kona-bá impaktu tabaku ba saúde, ne’e hala’o durante loron-ida, ne’ebé hetan partisipasaun másimu hosi estudante sira hosi EBC, ETV no ESG.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here