Bainhira atu halo viajen ba munisípiu tenke lori no hatudu kartaun vasina (kinur) ba pesoál saúde no seguransa sira ne’ebé halo vijilánsia iha pontu entrada sira. vasinasaun. Imajen TATOLI/Egas Cristóvão.

OÉ-CUSSE, 04 outubru 2021 (TATOLI)—Autoridade lokál suku Costa, sub-rejiaun Pante Makasar RAEOA, segunda ne’e hahú implementa ona programa “hatudu kartaun vasina” bainhira sidadaun sira trata dokumentu ruma iha sede suku.

Xefe suku Costa, Aleixo Abi, hateten objetivu hosi hatudu kartaun vasina ne’e atu kontribui apoiu programa Governu nian kona-bá kampaña vasinasauun no hanesan meu ida enkoraza sidadaun sira hotu iha suku no aldeia hodi hakbesik-aan ba iha fasilidade saúde, hodi bele simu vasina atu prevene-aan hosi moras COVID-19.

Notísia Relevante: Prevene COVID-19, MAE orienta autoridade lokál aplika regulamentu hatudu kartaun vasina

“Ba populasaun sira-ne’ebé mai trata dokumentu hanesan deklarasaun iha sede suku, tenke hatudu kartaun vasina. Se laiha, ami la atende tanba orientasaun hosi MAE mós hato’o tiha mai iha xefe suku sira atu haree ba kestaun ne’e,” Aleixo Abi informa ba Agência Tatoli iha sede suku Costa, Oé-Cusse.

Antes aplika regulamentu ne’e, nia informa, xefe suku ho xefe aldeia no konsellu suku sira halo uluk sensibilizasaun ba komunidade sira, tanba ida-ne’e husuba sidadaun hotu atu kumpre simu vasina hodi kombate COVID-19 iha rai Oé-Cusse.

Nune’e mós, nia informa ona ba ekipa saúde atu destaka iha sede suku bainhira halo pagamentu ba bolsa da mãe nian, karik benefisiáriu balun seidauk vasina karik bele fasilita simu vasina tanba iha Ofisiál Polisia Suku (OPS) ne’ebé sei ajuda fó seguransa ba sidaun sira-ne’ebé la kumpre regulamentu ne’e.

“Iha outubru ne’e, ami sei halo pagamentu ba bolsa da mãe no idozu-invalidéz iha sede suku, ami sei konvida pesoál saúde sira mai, sé mak seidauk vasina entaun ekipa saúde prepara kedas atu atende. Se lakohi, osan la lakon rai iha banku, ba simu tiha vasina mak mai fali foti osan,” nia dehan.

Jestór sub-rejiaun Passabe, Anton Ulan, hateten autoridade sira iha sub-rejiaun Passabe koopera hamutuk ho PNTL implementa ona preograma hatudu kartaun vasina iha fatin públiku hanesan iha merkadu tradisonál no pagamentu ba bolsa da mãe iha sede suku.

“Agora daudaun ne’e, pagamentu ba bolsa da mãe mós la’o hela, entaun ami koordena ho parte saúde sira mai destaka iha fatin pagamentu halo sensibilizasaun ba sira-ne’ebé seidauk simu vasina, husu atu simu hotu vasina mak foin bele simu osan ne’e. Tanba iha Passabe, komunidade barak mak seidauk simu vasina,” nia dehan.

Entretantu totál populasaun iha suku Costa hamutuk 17.351 kompostu hosi aldeia Sanane 11.237, aldeia Mahata 1.899, aldeia Oetfo 1.067, aldeia Lakufoan 707 no aldeia Oésono 2.441.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here