Prezidente Autoridade Munisípiu Baucau, Olívio 'Bou-Lesa' Freitas, hato’o diskursu iha lansamentu kampaña vasinasaun faze daruak, iha CCB, Villa-antiga, segunda (10/04). Imajen TATOLI/Natalino Belo

BAUCAU, 04 outubru 2021 (TATOLI)–Prezidente Autoridade Munisípiu (PAM), Olívio ‘Bou-Lesa’ Freitas, hateten, prezensa membru Governu na’in-haat iha munísipiu Baucau atu fó apoia aselera programa vasinasaun atubele atinje alvu iha rejiaun ne’e.

“Ha’u husu ba pesoál saúde no populasaun, labele halo intrepretasaun ida katak ita-nia Ministru rua no Vise-ministru rua mai iha ita-nia munísipiu atu hadau fali ita-boot sira-nia servisu, ne’e lae maibé sira mai atu fó apoia programa vasinasaun ne’e bele ramata tuir nia tempu,” PAM hateten iha ámbitu lansamentu kampaña vasinasaun faze daruak iha Sentru Konvensaun Baucau (CCB, sigla portugés), Villa-antiga, segunda ne’e.

Membru Governu haat kompostu hosi Ministru Petróleu no Minerál, Víctor da Conceição Soares, Ministru Turizmu Komérsiu no Indústria, José Lucas do Carmo da Silva, Vise-Ministru Admistrasaun Estatál, Lino de Jesus Torrezão no Vise Ministru Obra Públika, Nicolau Lino Freitas Belo, atu hamutuk ho autoridade lokál halo lansamentu kampaña vasinasaun períodu daruak iha Baucau, ho objetivu atu aselera kampaña vasinasaun durante semana-rua.

Notísia relevante: MPM urgullu ho partisipasaun komunidade Baucau ba vasina

Tuir Autoridade munisipál ne’e, prezensa membru Governu bele ajuda kovense populasaun partisipa vasina ho aproximasaun, nune’e bele atinje objetivu.

Tanba ne’e, Bou-Lesa husu atu autoridade postu administrativu, suku no aldeia atu koopera hodi konvense populasaun hola parte iha programa vasinasaun faze daruak ne’ebé hala’o durante fulan-ida, hahú inísiu fulan-outubru to’o ramata.

Iha tempu hanesan, Vise-Ministru Administrasaun Estatál, Lino de Jesus Torrezão, nota katak bazeia ba monitorizasaun durante fulan-ida iha Baucau, atividade vasinasaun seidauk atinje tuir alvu hosi Governu sentrál.

“Ho prezensa Ministru no Vise-Ministru, daudaun ita hamutuk atu ba hasoru ita-nia ema sira ne’ebé mak seidauk simu vasina tanba ita atu tau vasina iha sentru saúde defisil oituan, entaun agora ne’e la’ós ona tempu atu ko’alia ba malu, maibé tempu ona oinsá ita ba hasoru sira atu simu vasina,” governante ne’e hateten

Iha abertura seremónia ne’e, fó vasina ba sidadaun na’in-sia no entrega kartaun vasinasaun ba sidadaun hirak ne’ebé simu vasina.

Tuir dadus hosi servisu saúde Baucau, komunidade elejível (idade 18 ba leten) hamutuk 31.000 resin mak sei simu  vasina iha kampaña faze daruak, hosi totál ema 72.000 resin.

Ema ne’ebé simu ona vasina doze dahuluk iha Baucau atinje 57,1% no kompleta ona vasina 29,2%.

Jornalista : Natalino Belo

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here