Imajen/Espesial.

DILI, 04 outubru 2021 (TATOLI)—Prezidente Conselho de Imprensa (CI), Virgílio da Silva Guterres, informa preparasaun ba komemorasaun trajédia Balibo Five iha postu administrativu Balibo, Munisípiu Bobonaro, atinje ona 80%.

Notísia Relevante: Komemora Balibo five, CNC sei realiza atividade tolu

“Tinan kotuk, tanba pandemia ita la konsege realiza. Maibé ba tinan ida-ne’e, hafoin Governu hakotu serka sanitária no konfinamentu domisiliáru, Conselho de Imprensa iha posibilidade atu bele halo atividade iha out door. Ha’u bele hateten, preparativu ba komemorasaun ne’e bele dehan 80% preparadu.” Virgílio da Silva Guterres hateten ba Agência Tatoli, iha nia knaarfatin, Quintal Boot, Dili, segunda ne’e.

Iha semana kotuk, nia dehan, ekipa ezekutivu hosi CI ba tiha ona iha Bobonaro atu ko’alia ho autoridade munisipál no komunidade iha ne’ebá konabá posibilidade atu komemora fali Balibo Five iha Balibo.  

CI hetan ona informasaun hosi ezekutivu sira katak iha loron 11 outubru 2021, konseleiru CI sira sei sa’e hotu ba Balibo atu hahú realiza atividade balun.

Tuir nia, atividade loloos kona-bá komemorasaun trajedia Balibo Five ne’e sei selebra iha loron 16 outubru, maibé hahú ona halo dialogu ho komunidade no atividade espozisaun sei realiza iha loron 12 outubru. 

Komemorasaun ne’e, Conselho de Imprensa sei nafatin halo kooperasaun ho Centro Nacional Chega (CNC), hodi hanoin hikas memória pasada liuhosi atribuisaun prémiu, workshop no ezebisaun kona-bá istória pasada.

Konabá hili 16 outubru nu’udar loron Liberdade Imprensa Nasionál ba TimorLeste, Prezidente Conselho de Imprensa ne’e hatán, prosesu ida-ne’e la’o antes tiha ona no nia diskusaun ne’e hosi 2000 entre asosiasaun jornalista sira atu hili loron ida atu sai hanesan loron nasionál ba liberdade imprensa ninian, maibé to’o agora laiha rezultadu.

“Diskusaun ne’e kontinua la’o no iha 2014 no 2015 asosiasaun jornalista no TLPU mós hakerek ona karta ba Sekretária Estadu Komunikasaun Sosiál iha momentu ne’ebá katak loron ne’ebé jornalista sira propoin atu sai loron nasionál ne’e mak iha 16 outubru, tanba 16 outubru, loron ne’ebé jornalista na’in-lima hetan hetan oho hosi militar Indonézia iha Balibo 1975,” nia esplika.

Iha inisiu Conselho de Imprensa moris (2016), CI  kontinua halo advokasia hodi ko’alia no konsulta mós ho jornalista antigu sira no ikus mai konkorda katak loron 16 outubru ne’e mak loron ne’ebé preferidu atu sai loron nasionál ba liberdade imprensa.

“Agora daudaun, komemorasaun ba eventu Balibo Five ida-ne’e, sei halo Balibo sai sidade liberdade no mós atu propoin ba Estadu atu rekoñese liuhosi Dekretu Lei ka rezolusaun ruma katak loron 16 outubru sai hanesan loron nasionál liberdade imprensa,” nia dehan.

Balibo Five

Entretantu, iha loron 16 outubru 1975 mosu trajédia iha Balibo ne’ebé jornalista australianu no neozelandeze na’in-lima hetan oho hosi militár indonéziu bainhira halo knaar jornalizmu atu transmite ba kanál televizaun australianu, ne’ebé ikusmai trajédia ne’e koñesidu ho naran Balibo Five.

Jornalista hirak ne’e maka Greg Shackleton (reportér), Tony Stewart (gravadór lian), Gary Cunningham (cameraman) hosi mídia HSV-7 (Seven Network) Melbourne, no Brian Peters (cameraman) no Malcolm Rennie (reportér) hosi mídia TCN-9 (Nine Network) Sydney.

Notísia Relevante: Balibo Five, “Tim Susi” sunu jornalista na’in-lima to’o mutuk

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here