Matebian, Inspetór Xefe, Marçal Amaral Magno Guterres ‘Maucalau’. Imajen facebook.

DILI, 04 outubru 2021 (TATOLI)–Reprezentante Povu iha uma fukun Parlamentu Nasionál, segunda ne’e aprova votu pezár ba saudozu Marçal Amaral Magno Guterres “Mauclau” hodi fó rekuñesimentu ba nia kontribuisaun durante períodu rezisténsia.

Votu pezár ne’e aprovadu ho rezultadu votasaun a-favor 48 kontra 0 no abstensaun 0.

Notísia Relevante: Komandu PNTL hato’o sentidu lutu ba família Inspetór Xefe Mauclau

“Votu númeru 28/2021 aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Mauclau hakotu is iha loron 07 setembru 2021 liubá, iha klínika Vera Cruz ho idade tinan 49.

Xefe Bankada Partidu Libertasaun Populár (PLP), Deputadu Cornélio Gama “L7” ne’ebé uluk fó orientasaun ba Mauclao sente lakon timor-oan di’ak ida-ne’ebé sempre kumpre orientasaun iha tempu funu.

“Nia eskola iha vila laran no buat-ne’ebé ami haruka, nia halo-tuir duni ho pasiénsia. Kuandu nia to’o iha Rejiaun III nia dehan hanesan ne’e, komandante ita rona ona notisiáriu mai hosi li’ur ne’e barak ona, oinsá mak ita bele tuir ida-ne’e. Ha’u dehan ba nia hanesan ne’e, buat hotu-hotu ne’ebé ita hanoin hetan mak mate ka moris ukun rasik-aan,” Deputadu L7 haktuir.

Biografia Mauclao

Marçal Amaral Magno Guterres “Mauclau” moris iha Bahamori, 15 fevereiru 1972, oan hosi José Amaral Guterres no Aurélia Magno.

Mauclao nia partisipasaun iha manifestasaun kontra militár indonézia iha okazisaun selebrasaun misa hosi Papa João II iha Tasi Tolu, Dili.

Iha tinan 1991 no 1992, Mauclao integra ba organizasaun Sagrada Família no OPJECATLL ne’ebé koñesidu ho naran kódigu “Xanak”.

Iha 1993, hetan orientasaun hosi Komandante Cornélio Gama “L7”, nu’udar responsável ba kriasaun sélula klandestina ho naran “Knuk Timor Oan”, hamutuk ho Salvador Guterres (Rolas) no Isequel da Silva, iha área Bekusi de Baixo. Iha 1994, nu’udar responsável ba mobilizasaun lojístika ba FALINTIL.

Iha 1994 no 1995 partisipa atividade propaganda polítika iha Universidade Timor-Timur, hodi halo reasaun ba atuasaun forsa Indonézia nian iha momentu ne’ebá.

Iha loron 14 abríl 1996, akompaña jornalista estranjeiru na’in-rua hosi Noruega no Olanda, hodi intervista Sub-Xefe Estadu Maiór, Lere Anan Timur, iha zona gerilla iha ponta leste.

Hosi rezultadu asaun propaganda ne’e, Mauclau no ativista sira seluk ne’e nu’udar alvu persegisaun hosi forsa indonézia, no forsa Indonézia kaptura Mauclau iha 1996.

Iha 1998, prepara no pinta Bandeira nasionál RDTL ba manifestasaun delegasaun hosi Organizasaun Nasaun Unida ne’ebé lidera hosi Jamshed Marker, iha otel Mahkota nia oin. No iha loron 3 novembru 1998, Maucalu hetan kapturadu hosi militár indonézia.

Iha juñu no jullu 1999, hetan orientasaun hosi Komandu Luta Rejiaun III hodi sensibiliza populasaun hodi forma ho konsiente nune’e populasaun prepara-aan molok loron konsulta popular 30 agostu tinan 1999.

Hafoin restaurasaun independénsia, kontribui ho ativamente ba dezenvolvimentu Timor-Leste nian liuhosi instituisaun Polísia Nasionál Timor-Leste (PNTL) iha 2001 ne’ebé asume kargu oioin iha PNTL nune’e iha 2021 nu’udar Inspesaun-Jerál iha Kuartél-Jerál PNTL.

Proponente ba proposta votu pezár ne’e inísia hosi deputadu Cornélio Gama, Marcos Xavier, Domingos Lemos no Alexandrino Cardoso da Cruz.

Jornalista : Evaristo Soares Martins

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here