Plenária Parlamentu Nasionál. Imajen Tatoli/António Gonçalves.

DILI, 04 outubru 2021 (TATOLI)–Parlamentu Nasionál, segunda ne’e altera atigu balun hosi Lei Númeru 5/2016 kona-ba estabelese prosedimentu Konsesaun Indultu no Komunikasaun Pena iha faze jeneralidade.

Projetu-lei ne’e asina hosi Deputadu José Pacheco Soares no Francisco Vasconcleos. Inisiativa ne’e aprovadu ho rezultadu votasaun a-favór 38, kontra 16 no abstensaun 0.

Notísia Relevante: Plenária baixa alterasaun Lei Konsesaun Indultu-Komutasaun Pena ba Komisaun A

“Nune’e projetu-lei númeru 33/V/3a-prmeira alterasaun Lei númeru 5/2016, 25 maiu (Estabelese prosedimentu Konsesaun Indultu no Komunikasaun Pena) aprovadu iha jeneralidade, tuir mai debate espesialidade haruka fila ba Komisaun A,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Tur relatóriu no paresér ne’ebé Agência TATOLI asesu katak, projetu-lei atu altera artigu hamutuk haat hosi Lei númeru 5/2016, 25 maiu ne’e kompostu hosi artigu 4 (krime insussetível indultu), artigu 5 (Data anuál ba konsesaun ba indultu no komutasaun pena), artigu 8 (paresér no remesa autos) no artigu 9 (dekretu prezidensiál no libertasaun imediata rekluzu).

Alterasaun proposta iha projetu-lei

Artigu 4 (krime insussetível indultu) (textu orijinál) esplika, pena prizaiun hosi arguido sira-ne’ebé kondenadu ne’ebé rezulta hosi kazu terrorizmu, kriminalidade violenta ka altamente organizada nu’udar insussetível indultu ka komutasaun pena.

Nune’e Komisaun A konklui katak komparasaun entre textu atuál (orijinál) no textu alterasaun ho intensaun subjasente alterasaun artigu ne’e nune’e prodús textu ida-ne’ebé klaru liu no ho linguajen ne’ebé direita liu. Ezemplu, textu atuál privilijia iha identifikasaun krime, kualifikasaun konduta, asosiada no kazu sira seluk, ho forma ezekusaun krime. Elenku (elenco) hosi krime ne’e sofre alterasaun kiik (pequenas alterações).

Nune’e mós halakon alínea d númeru 3 hosi artigu 4, ne’ebé previstu, integra krime alterasaun Estadu Direitu, koasaun kontra óragun konstitusionál, serbisu ka kolaborasaun ho forsa inimiga sira, sabotaje kontra defeza nasionál, violasaun segredu no infidelidade diplomátika, dezde krime forma violenta ka organizada. Razaun halo alterasaun tanba elenku hosi krime kontra seguransa estadu previstu ona iha artigu 196, 203, 205 no 206 iha Kódigu Penál (CP, sigla portugés).

Artigu 5 (Data anuál ba konsesaun ba indultu no komutasaun pena), textu orijinál esplika, indultu no komutasaun pena bele konsedidu iha duas datas anuál ne’ebé define hosi Prezidente Repúblika.

Iha proposta alterasaun ba artigu 5 define nune’e: adisiona ba atuál konteúdu hosi artigu ne’e; (i) dahuluk, forma ato (atu) Prezidente Repúblika ba konsesaun indultu ka komutasaun pena; (ii) daruak, impór ba publikasaun iha Jornál Repúblika. iha sikun seluk, konfere podér ba Prezidente Repúblika hodi fixa data limite kona-bá indultu ne’ebé aprezenta hosi Ministru Justisa.

Artigu 8 (paresér no remesa autos) ne’ebé fixa iha textu orijinál hateten: Finda instrusaun, autu kontinuadu ho vista ba Ministériu Públiku, ne’ebé emite paresér iha prazu loron lima (5). Nune’e  mós resebidu paresér ne’ebé refere númeru anteriór, juiz pronunsia iha prazu loron lima (5) no  ordena remesa autos ba Ministru Justisa, ne’ebé leva desizaun Prezidente Repúblika nian.

Iha proposta alterasaun propoin nune’e: Pretende hodi introdús norma atribuisaun kompeténsia ba Ministru Justisa. Akordu ho projetu-lei ne’e kabe ba Ministru Justisa, hodi halo verifikasaun regularidade intrusaun hosi prosesu no verifikasaun preenximentu hosi rekizitu legál konsesaun ba indultu ka komunikasaun pena (númeru 3 no númeru 4 hosi artigu 8 iha redasaun projetu-lei ne’e).

Nune’e mós kazu prosesu ne’ebé inkompletu la komprimenta rekizitu legál, Ministru Justisa notifika rekerente atu kompleta ka halo kontestasaun (númeru 5 hosi artigu 8 iha projetu-lei ne’e).

Artigu 9 (dekretu prezidensiál no libertasaun imediata rekluzu), artigu ne’e adisiona númeru foun rua atu kontempla posibilidade Prezidente Repúblika “subordina konsesaun indultu ka komutasaun pena” ho kondisaun ida, ne’ebé aplika ba kazu rejime ne’ebé previstu iha artigu 69 hosi Kódigu Penál (CP, sigla portugés).

Jornalista : Evaristo Soares Martins

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here