Imajen/Media PR.

DILI, 04 outubru 2021 (TATOLI)–Orsamentu privativu hosi Parlamentu Nasionál ho montante $14.727.552 ba tinan fiskál 2022 aprovadu ho rezultadu votasaun a-favór 41, kontra 0 no abstensaun 11.

Notísia Relevante: Komisaun C submete relatóriu orsamentu privativu ba PPN

“Nune’e orsamentu privativu Parlamentu Nasionál pasa iha jeneralidade, no debate espesialidade kontinua aban ho proposta alterasaun tolu ne’ebé admitidu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Orsamentu privadu Parlamentu Nasionál ba tinan fiskál 2022 ho montante $14.727.552 ne’ebé koloka ba saláriu no vensimentu millaun $5,600 (38%), ba bens (sasán) no serbisu millaun $6,638 (45%), kapitál menór rihun $935 (6.3%), kapitál dezenvolvimentu zero no transferénsia públika millaun $1,552 (11%).

Hosi montante orsamentu ne’e kontinua ho planu estratejiku 2017-2022, ne’ebé asenta objetivu estratéjiku hamutuk lima mak hanesan; hasa’e relasaun internasionál no kooperasaun parlamentár, garante ezersísiu funsaun konstitusionál parlamentu nian, promove kultura transparénsia iha parlamentu, implementa polítika jéneru no ikus liu boa governasaun no jestaun institusionál.

Planu Asaun Parlamentu Nasionál nian iha grande prioridade hamutuk 18. Purtantu Parlamentu Nasionál iha funsionáriu permanente hamutuk 147, funsionáriu nomeadu ba komisaun hamutuk 27 no funsionáriu nomeadu ba kargu diresaun no xefia hamutuk 25.

Entretantu tuir portál transparénsia Ministériu Finansa nian fó-sai katak, orsamentu privativu iha 2021 ho montante $ $14,484,066.00. Hosi montante orsamentu ne’e gasta ona $8,623,689.41, saldu $4,695,718.43, kompromisu sira $124,747.50, obrigasaun $1,039,910.66 no ezekusaun atinje 66.7%.

Jornalista : Evaristo Soares Martins

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here