SSekretáriu Estadu Protesaun Sivil, Joaquim José Gusmão dos Reis Martins. Imajen TATOLI/Francisco Sony

DILI, 04 outubru 2021 (TATOLI)–Sekretaria Estadu Protesaun Sivil (SEPS) iha ona konkordánsia ho operadór telekomunikasaun tolu hanesan Timor Telecom, Telkomcel, no Telemor, hodi fó informasaun liuhosi mensajen alerta ba telemóvel, kona-ba situasaun klimátika iha Timor-Leste. 

“SEPS iha ona konkordánsia ho operadór telekomunikasaun tolu hodi fó sai mensajen alerta ba kliente, nune’e hahú semana oin sira bele fó sai ona informasaun kona-ba situasaun klimátika iha Timor-Leste,” Sekretáriu Estadu Protesaun Sivil, Joaquim José Gusmão dos Reis Martins, relata, hafoin reuniaun semanál ho Primeiru-Ministru, Taur Matan Ruak, iha Rezidénsia Ofisiál, Farol, segunda ne’e.

Notísia relevante: Manleuana no Metinaro sai sentru akollimentu multifunsaun ba vítima inundasaun

SEPS serbisu hamutuk ho Diresaun Nasionál Meteorolojia Timor-Leste (DNMTL), hodi fó sai informasaun nafatin kona-ba avizu no alerta situasaun klimátika iha territóriu nasionál.

“Kona-ba sentru akollimentu multifunsaun, Governu nia planu atubele estabelese no la’ós protesaun sivil mesak mak hala’o, maibé hamutuk ho liña ministériu seluk hanesan Ministériu Administrasaun Estatál no Sekretaria Estadu Terra no Propriedade hodi identifika fatin ne’ebé mak ita bele harii, daudaun ne’e diskute hela molok estabelese sentru,” nia akresenta.

Tuir governante ne’e, kona-ba fatin atu harii sentru akollimentu multifunsaun, depende iha ne’ebé de’it maibé importante identifika rai.

Antes ne’e, fatin ne’ebé identifika sai sentru akollimentu multifunsaun ba vítima inundasaun mak iha Manleuana no Metinaro.

Daudaun iha ema hamutuk na’in-731 maka hela iha sentru akollimentu ativu neen iha sidade Dili.

Hafoin inundasaun iha loron 04 abríl 2021, ema na’in-34 maka mate no na’in-14 maka lakon iha nível nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here