Kaderneta Eskolár. Imajen/Espesiál

OÉ-CUSSE, 04 outubru 2021 (TATOLI)—Diretór Eskola Bázika Sentrál (EBC, sigla portugés) Passabe, Gaspar Da Cruz, informa estudante sétimu-ano hamutuk 160 mak seidauk hetan kaderneta eskolár, entaun durante realiza ezame primeiru no segundu períodu ne’e estudante sira seidauk asesu sira-nia valór ezame.

“Ami araska. Profesór sira ejize ha’u hanesan diretór atu buka dalan, maibé mai to’o autoridade laiha solusaun. Situasuan ne’e estudante sira-nia inan-aman sira ejize beibeik ha’u, tanba sira atu haree sira-nia oan sira-nia valór ezame. Iha EBF ne’e só sétimu-ano mak laiha,” Gaspar da Cruz hato’o preokupasaun ne’e iha enkontru pagamentu osan ba apoiu estudante sira iha salaun Edukasaun Santa Rosa, Oé-Cusse, segunda ne’e.

Ni ainforma, totál estudante iha EBC Passabe hamutuk 534 maibé nia preokupa tebes kona-bá matéria didátiku hanesan tinta no surat-tahan laiha, tanba loloos estudante nia valor ne’e atu print out liuhosi surat-tahan baibain maibé surat-tahán no tinta mak laiha.

Nia espera, molok realiza ezame nasionál iha tinan ne’e, autoridade bele responde ona preokupasaun sira-ne’e, nune’e bele garante kualidade ezame nasionál.

Iha fatin hanesan, Diretór ESG Bakui, Domingos Ramos Anunu, reforsa-tán katak situasaun ne’e la’ós akontese de’it ba estudante sira iha Passabe maibé eskola balun iha EBF seidauk iha kaderneta eskokár.

Estudante la tama eskola tanba tauk vasina

Diretór Eskola Bázika Sentrál (EBC, sigla portugés) Passabe, Gaspar da Cruz, hateten durante Governu suspende aula-prezensiál tanba kazu COVID-19, estudante sei kontinua trauma no laiha autorizasaun hosi inan-aman atu simu vasina iha eskola maske Governu re-ativa ona aula prezensiál iha semana kotuk.

“Ami triste tebes, feriádu fulan-rua tanba COVID-19. Governu re-ativa fali ona eskola mabé alunu balun de’it mak ba eskola, barak inan-aman la-autoriza sira atu ba eskola tanba sira lakohi oan sira simu vasina. Ida-ne’e ha’u ko’alia onestu de’it. Ami hanesan profesór iha baze, susar atu aproxima sira atu tama eskola,” Gaspar da Cruz hateten.

Aleinde ne’e, nia dehan, nu’udar manorin kada loron kontinua hala’o kna’ar nafatin maibé sala-de-aula balun mamuk tanba profesór balun mós seidauk tama. 

Daudaun ne’e, ezame nasionál besik ona no administrasaun kaderneta eskolár atu prenxe ne’e araska iha baze, entaun presiza autoridade halo sensibilizasaun kle’an tanba foin daudaun ne’e autoridade mós distribui ona despaixu ida atu rekolla alunus idade 12 to’o 17 simu vasina.

Dirijente eskola ne’e, kestiona mós kona-bá valór ezame sira iha RAEOA hahú hosi tinan 2020 to’o 2021, kualidade valór estudante iha RAEOA monu tanba impaktu hosi COVID-19.

“Ha’u haree rezultadu valór tinan kotuk, maioria valor aas mak neen (6) de’it. Ida-ne’e hatudu ita-nia valór ezame monu kompara ho tinan 2019 ba kotuk, ita iha valór hitu (7) to’o sia (9). Agora, tinan kotuk ho tinan ne’e sa’e mak 6,5 de’it, ne’e hatudu valór ezame iha RAEOA monu,” nia dehan.

Diretór ESG Bakui, Domingos Ramos Anunu, hato’o razaun ba autoridade RAEOA, atu enkoraja inan-aman hosi estudante sira, nune’e bele partisipa iha aula prezensiál hodi prepara hasoru ezame nasionál

Iha suku Naimeco, Governu aplika Serka Sanitária desde 28 agostu to’o setembru ne’e, fulan rua tomak lahalo aprendizajén, nune’e iha semana kotuk foin realiza ezame segundu períodu maibé estudante barak mak la tuir tanba sei tauk hela COVID-19 no tauk atu simu vasina.

Ezame nasionál, tuir deklarasaun Governu katak sei realiza iha fulan outubru ne’e, entaun autoridade RAEOA presiza halo preparasaun másimu hodi kria politika oinsá enkoraja inan-aman sira, nune’e autoriza oan-sira bele ba eskola no estduante sira bele tuir ezame nasionál.

Hatán ba preokupasaun ne’e, Sekretária Rejionál Asuntu Edukasaun no Solidariedade Sosiál no Inkluzaun, Avelina da Costa, hateten kona-bá estudante ta’uk vasina, daudaun ne’e Sekretáriu Rejionál Asuntu Saúde hamutuk ho membru Governu sira sei tun to’o baze hodi halo sensibilizasaun ba labarik idade 12 to’o 17.

“Iha semana ne’e, membru Governu ho autoridade sei halo kampaña vasinasaun iha baze. Entaun, ita sei enkoraza husu inan-aman sira atu komprende impaktu hosi vasinasaun ne’e, nune’e bele autoriza oan sira hakbesik ba fasilidade saúde simu vasina, hodi kontinua ativa iha aula prezensiál,” nia dehan.

Iha estudante balun seidauk hetan kaderneta eskolár, nia hatán, daudaun ne’e Ministru Edukasaun Juventude no Desportu (MEJD), distribui ona ba munisípiu sira inklui RAEOA maibé daudaun ne’e RAEOA nian sei iha nasionál no hein katak iha tempu badak sei to’o Oé-Cusse hodi bele distribui ba eskola sira.

“La’ós estudante iha EBC Passabe de’it mak la hetan kaderneta eskolár maibé kuaze eskola barak iha Oé-Cusse, estudante barak seidauk iha kaderneta eskolár. Tanba ne’e, husu ba dirijente eskola sira atu pasiénsia hodi hein, tanba Autoridade sei lakohi situasaun ne’e akontese ba eskola sira ho tempu naruk,” nia dehan.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here