Prezidente Conselho de Imprensa, Virgílio da Silva Guterres. Imajen Tatoli/Francisco Sony.

DILI, 04 outubru 2021 (TATOLI)—Conselho de Imprensa (CI) segunda ne’e selebra asina akordu kooperasaun ho Estadu Unidu Amérika (EUA), kona-bá fó formasaun Fact Checking ba estudante sira iha munisípiu Baucau, Dili, Ermera no Manufahi.

Notísia Relevante: SEKOMS husu públiku labele prodús infomasaun hoax durante EE

Prezidente CI, Virgílio da Silva Guterres, hateten asina akordu ida-ne’e hanesan kooperasaun ida entre Embaixada Amérika ho Konsellu Imprensa, tanba sira fó apoiu $10.000 ba CI atu halo formasaun ba estudante sira kona-bá Fact Checking.

“Formasaun ida-ne’ebé atu dura parte hosi kombate kontra dezinformasaun kontra fake news, entaun ida-ne’e mak objetivu hosi kooperasaun ne’e. Hein katak iha tempu badak CI hahú planu atu konkretiza formasaun sira-ne’e,” Virgílio da Silva Guterres hateten ba jornalista sira, iha edifísiu CI, Quintal Boot, Dili, segunda ne’e.

Tuir nia, atu kombate informasaun falsu ne’e sai luta konstante ka luta kontinua ema hotuu nian atu kombate informasaun falsu (hoax) ne’ebé agora ne’e espalla iha rede sosiál sira.

“Labele duun matak ema. Ida-ne’e, uluk Moises nia tempu kedas hanorin tiha ona maibé ita kontinua la’o hela. Entaun, ita-nia luta mós tenke loro-loron nafatin atu kontra, ho nune’e ema barak no ita-nia sidadaun sira labele monu ba ba lia-bosok, lia-bobar no lia-butar sira-ne’ebé ema fó sai,” nia dehan.

Iha sorin seluk, Enkaregadu Negósiu Embaixada Estadu Unidu Amérika, Tom Daley, hateten Estadu Unidu Amérika onradu halo parseria ho Conselho de Imprensa (CI) liuhosi subvensaun ho montante $10.000.

Notísia Relevante: SEKOMS hakarak inisia lejizlasaun ‘kombate hoax’

“Ha’u hakarak agradese ba CI sira-nia servisu hodi hametin setór komunikasaun sosiál iha Timor-Leste. Ha’u mós hakarak agradese ba Virgilio Guterres, tanba ba nia lideransa hodi dezenvolve inisiativa ida-ne’e,” nia dehan.

Programa ida-ne’e reprezenta esforsu atu hasoru dezafiu komun ne’ebé ema sira iha Estadu Unidu no Timor-Leste hasoru loro-loron mak informasaun falsu no dezinformasaun ne’ebé ema kria ho intensaun atu bosok ema seluk.

Nune’e, sosiedade demokrátika sira hari’i bazea ba espíritu abertura no liberdade espresaun maibé dala barak ema bele esplora atu kria istória falsu ka notísia falsu sira ho konsekuénsia hirak ne’ebé sériu.

Tuir nia, iha Estadu Unidu, Timor-Leste no sosiedade sira ne’ebé livre no nakloke iha fatin hotu-hotu, importante tebes ba jornalista no sidadaun sira iha moris loro-loron atu bele rekoñese informasaun falsu no dezinformasaun iha notisia no mídia sosiál.

“Ita mós presiza luta hasoru informasaun falsu ne’e liuhosi verifikasaun ba faktu sira. Tanba ne’e mak programa ida-ne’e sei fó formasaun ba lideransa timor-oan sira na’in-250 iha Dili, Ermera, Baucau no Manufahi, hodi asume dezafiu ida-ne’e liuhosi koñesimentu foun no ferramentu foun hodi uza ba verifika faktu,” nia esplika.

Programa ida-ne’e reprezenta elementu ida hosi kompromisu Estadu Unidu Amérika nian atu hametin parseria no amizade rohan laek ho Timor-Leste.

“Valor hirak ne’ebé EUA no Timor-Leste fahe ba malu, inklui demokrasia no liberdade espresaun sei permite parseria ne’e atu kontinua buras ba bebeik iha tinan hirak tuir mai ho espíritu respeitu malu, amizade no kooperasaun,” nia dehan.

Notísia Relevante: CI komprometidu kombate “hoax” ho literásia mídia no literásia dijitál

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here