Médiku sira halo hela tratamentu ba pasiente COVID-19 ida iha sala Izolamentu Ospitál Lahane, sábadu (18/09). Imajen Tatoli/Francisco Sony.

DILI, 02 outubru   2021 (TATOLI)—Sala Situasaun, Sentru Integradu Jestaun Krize (SIJK), rejista kazu mate ida,pozitivu 28,  rekuperadu 21, no kazu ativu 750.

“Totál óbitu ne’ebé relata ohin, 2  outubru 2021 ida, ho detalle hanesan, feto, idade tinan 56, hela iha RAEOA, vasina seidauk kompletu, iha 27 setembru 2021, diagnóstikadu Sindroma Insufisiénsia Respiratória Aguda (SIRA) tanba COVID-19. Iha loron ne’e kedas hala’o tratamenu iha fatin izolamentu iha RAEOA. Matebian iha mós problema diabete ho anemia grave. Horiseik loraik 16h00 matebian iis-kotu, iha RAEOA. Família kolabora ho ekipa saúde, hodi hala’o funerál tuir protokolu ne’ebé adota iha TimorLeste,’’ Kordenadór Forsa-Tarefa ba Prevensaun no Mitigasaun, Rui Maria de Araújo hateten liuhosi komunikadu, sabadu ne’e.

Kazu foun ohin 28  hosi Dili na’in hitu, Baucau 20, no munisípiu seluk hamutuk na’in ida  ne’ebé kompostu hosi mane 18, feto 10.Hosi totál kazu detetadu foun ohin, ho idade 20:7 (18,9%) ho idade entre tinan 12-59 na’in 20(75,6%), idade 60   na’in ida. Husi kazu detetadu foun ohin haat kazu  ka 14,4% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o   02 outubru  2021 hamutuk 19.563. Hosi horisehik mai ohin, teste ne’ebé Laboratóriu Nasionál Saúde halo hamutuk 51, PCR, ho detallu hanesan, Vijilánsia sentinela  la iha, rastreiu ba kontaktu ka Contact tracing 21,  Rastreiu Aleatóriu  ka Random Screening na’in 15, viájen sai-hosi serka sanitária hosi Dili 11,  Viájen internasionál tolu, follow up iha kuarentena na’in ida.

Totál testes PCR ne’ebé halo horisehik 01outubru  iha munisípiu-sira seluk, RAEOA no HNGV hamutuk 227, ho  detalla hanesan tuir-mai, Maubisse haat, Maliana 12, Viqueque  neen, Suai 20, Baucau 37,  Ermera neen,  RAEOA 19, HNGV 90, Lospalos 33.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10H00,  loron 02 outubro tuir sistema informasaun Saúde iha Ministériu Saúde  totál  kumulativu 1ª doze iha Dili (78,7%). Totál  kumulativu 2ª doze  iha Dili (68,7%). No, ema ne’ebé simu ona vasina doze dahuluk iha Timor Leste  (60,3%). Simu ona doze daruak  (37,5%).

Atubele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 2,3/100 mil abitante,  enkuantu ba de’it munisípiu Dili 3,5/100 mil abitante.

Ohin, Baucau iha insidénsia 10,1/100 mil abitante no RAEOA iha insidénsia 4,2/100 mil Dadus iha leten hatudu katak  insidénsia munisípiu Dili, munisípiu Baucau   no RAEOA tuir-tuir malu aas-liu, iha Timor-Leste laran tomak  hatudu risku aas-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron  02 outubro  de 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu na’in 30,  ho detalle hanesan grave hamutuk na’in  lima, na’in  ida uza ventiladór, na’in rua uza  CPAP (Continuous Positive Airway Pressure), na’in rua uza oksizeniu, moderadu hamutuk ema na’in 22.Kaman ema na’in hamutuk tolu.

Informa bá públiku katak hahú 30 Setembru 2022, Governu hakotu ona serka sanitária iha munisípiu Dili. Nune’e, sidadaun sira bele ona sirkula livremente sai/ka tama Munisípiu Dili, maibé tenki nafatin kumpri regra prevensaun & ijiéne pesoál hanesan uza máskara, fase-liman bebeik ho bee no sabaun ka ho dezinfetante ruma, mantein distánsia minimu metru ida ho balun, evita halibur malu barak.

Aproveita hato’o mós ba públiku katak, fatin atu halo teste PCR maka hanesan bainhira sente moras isin-manas, me’ar, kakorok moras ka sintoma seluktan  bele ba konsulta iha Sentru Saúde ne’ebé besik, atu bele halo swab bainhira atu husu autorizasaun esepsionál sai husi no tama serka sanitária iha Dili bele ba halo swab iha Centro Convenções Dili (CCD). Bainhira sente katak sai kontaktu-besik ba ema ruma ne’ebé detetau pozitivu ona, no seidauk hetan kontaktu husi ekipa konjunta saúde bele liga ba númeru 119 atu organiza oinsá foti swab.

Husu kompriensaun no pasiénsia populasaun iha Timor-Leste laran tomak, atu kolabora no kontribui hodi vírus SARS-CoV-2, inkui variante Delta, labele hada’et ba ema barak liu tán. Favór hela iha uma, bainhira la presiza atu sai. Apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde Sentru Saúde ka Ospitál ne’ebé besik, bainhira sente isin-manas, ka kakorok moras, ka inus-ben, ka mear, hodi bele hetan atendimentu husi profisionál saúde sira. Bainhira sedu liu hatene se virus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran sindroma insufisiénsia respiratória aguda (SIRA), ka susar/difisil atu dada-i’is.

Ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai. Regra sira ne’e, hanesan ita hotu hatene ona, maka uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er-liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here