Funsionáriu EDTL hadi’a hela liña eletrisidade ne’ebé avaria. Imajen/Doc. Tatoli

BOBOBONARO, 01 outubru 2021 (TATOLI)- Sekretáriu Tékniku Administrasaun Eleitorál (STAE), identifika sentru votasaun iha munisípiu Bobonaro hamutuk 40 mak seidauk asesu eletrisidade.

Diretor STAE Munisípiu Bobonaro, Mariano Viegas Amaral, aprezenta problema ne’e, durante halo enkontru avaliasaun no  preparasaun  ba eleisaun prezidensiál 2022 ho autoridade no entidade relevante Munisípiu Bobonaro iha salaun CNE Soso Maliana, sesta ne’e.

“Bazeia ba rezultadu ne’ebé ami nia ekipa sira ba halo kordenasaun ho autoridade lokál, Xefe aldeia sira ,ami identifika sentru votasaun, la asesu eletrisidade, iha postu administrativu Atabae ha’at, Balibo hitu, Bobonaro sonolu, Cailaco hitu, Loloto’e neen no Maliana, sentru Votasaun neen mak la asesu eletrisidade; totál 40” nia informa.

Problema ne’e STAE Bobonaro preve ona iha Planu ba preparasaun eleisaun prezidensiál 2022, nune’e Governu bele tau iha konsiderasaun, atu solusiona problema ne’e liuhosi meius ne’ebé bele fasilita brigadista no ofisiál sira halo kontajen votus iha tempu kalan.

“Ida ne’e ita preve orsamentu bainhira loron eleisaun kontajen votu ne’e maneira oinsá depende na’in ulun sora foti desizaun; atu aluga jeradór ka aranja petromas ka  prepara solar panel, depende na’in ulun sira” Nia dehan.

Entertantu, planu sentru votasaun ne’ebé ekipa STAE Bobonaro prepara ba 2022.Totál 130 no estasaun votu 150, númeru ne’e kompostu hosi Postu administrativu Atabae sentru Votasaaun 13 no estasaun votu 15, Balibo iha sentru Votasaun 20 no estasaun  votu 24.

Iha postu administrativu Bobonaro,Sentru votasaun 40 ho nia estasaun votu 44, Cailaco sentru votasaun 15 no estasaun votu 16, Postu administrativu Lolotoe sentru votasaun 15 no estasaun votu 15, no iha postu administrativu Maliana,sentru votasaun 28 no estasaun votu 36, totál sentru votasaun 130 no estasaun votu 150. Ho aumenta númeru sentru votasaun ne’e atu fasilita komunidade ba ezerse nia direitu la presiza la’o dook nune’e bele hasae taxa partisipasaun eleitór.

Atu asegura materiál sensitivu no la sensitivu sira iha eleisaun Prezidensiál 2022, STAE Bobonaro presija rekruta Brigada 130 no ofisial eleitorál totál 1.500.

“Iha Atabae Brigada 13, Ofisiál eleitorál 150, Balibo Brigada 20, Ofisiál eleitoral 240, Bobonaro Brigada 40, Ofisiál eleitorál 440, Cailaco Brigada 15 Ofisiál eleitorál 160, Lolotoe Brigada 14, Ofisiál eleitorál 150 no Postu administrativu Maliana Brigada 28,  Ofisiál eleitoral 360” Nia dehan.

Ekuanto kondisaun estrada ne’ebé STAE Bobonaro propoin atu hadia no reablita mak hanesan, Atabae iha 3,Balibo 3, Bobonaro 14, Cailaco 10, Loloto’e 7 no Maliana 2 total 39,fatin hirak ne’e bele fo risku ba offisial eleitoral ho brigada sira difisil atu transporta material sensitivu ba sentru votasaun no estasaun de votu ne’ebé iha liu area rural.

Nune’e moa planu ba transporte ne’ebé atu distribui no rekola material sensitivu sira,postu administrativu Atabae presija kareta 6, Balibo 8, Bobonaro 18, Loloto’e 6 no Maliana 11 total 57 ne’ebé presiza instituisaun estadu no ONG lokal aira apoia iha eleisaun prezidensial 2022.

Enkuantu hahú hosi janeiru to’o setembru 2021, STAE Bobonaro rejista eleitór foun hamutuk 2.097 no eleitor óbitu ne’ebé konsege elimina hamutuk 862.

Dadaun ne’e STAE Bobonaro mós halo hela resensiamentu eleitorál no atualizasaun baze dadus iha de’it postu administativu Maliana, tanba seidauk hetan apoia ekipamentu produsaun kartaun eleitorál hosi nasionál. Maibé, STAE mós sei atende komunidade iha 15 dias, antes loron eleisaun STAE sei fasilita atu prodús kartaun eleitorál.

Alende ne’e preparasaun ida mak, STAE hahú halo ona edukasaun votante  iha suku 50, maibé partisipasaun komunidade mak ladun masimu, maski ekipa halo ona koordenasaun servisu ho autoridade lokál.

Totál funsionáriu ne’ebé mak atu implementa planu operasionál  sira mak, funsionáriu permanenti lima, Kazuál munisípiu sia, kazu postu administrativu 18, totál funsionáriu 39 la inklui Brigada no Ofisiál eleitorál.

Jornalista: Sérgio da Cruz

Editor: Rafy Belo

 

PUBLISIDADEiklan

HAKEREK NO HATÁN

Please enter your comment!
Please enter your name here