Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 01 outubru  2021 (TATOLI)—Sekretaria Estadu Komunikasaun Sosiál (SEKOMS) iha vizaun ba tinan 2023, ne’ebé hakarak dijitaliza mídia munisipál, nune’e komunidade bele asesu informasaun ho fasil no lalais.

“Daudaun ne’e SEKOMS liuhosi Diresaun Nasionál Promosaun no Dezenvolvimentu Mídia Lokál (DNPDML) halo esforsu maka’as atubele kolabora ho Autoridade munisipál sira, nune’e bele dezenvolve di’ak liután mídia munisipál atu dijitaliza hodi komunidade iha área rurál bele asesu informasaun ho lalais,” Sekretáriu Estadu Komunikasaun Sosiál, Merício Juvinal dos Reis ‘Akara’, hateten, iha semináriu nasionál, iha Hotel Timor, sesta ne’e.

SEKOMS hahú trasa polítika diversifikasaun mídia, atu dezenvolve mídia munisipál, liuliu insentiva rádiu komunikadade sira, atu nune’e bele transmite informasaun iha munsípiu mai nasionál.

Notísia relevante: SEKOMS fó subvensaun suku Fuat no Seloi estabelese sentru informasaun

Aleinde ne’e, SEKOMS implemeta programa ‘Naroman ba Suku’, ne’ebé mai kedan ho sentru informasaun suku atu lori Governu besik liu ba povu iha área rurál.

“Ita harakarak estabelese hodi informasaun sira iha munisípiu, mídia nasionál la presiza halo kobertura, maibé sira iha munisípiu maka transmite mai iha nasionál, hanesan rádiu komunidade no sentru informasaun iha suku,” nia akresenta.

Sekretáriu Estadu ne’e hakarak kolabora ho Autoridade lokál sira, atu prevee orsamentu, nune’e bele dezenvolve diak liután sentru informasaun suku hodi povu akompaña informasaun ho di’ak.

“Presiza dijitaliza mídia munisipál tanba bele redúz gastu, kuandu xefe suku balun ka komunidade sira hakarak hato’o informsaun, la presiza bolu mídia nasionál ba to’o suku ka aldeia. Sira mai hato’o de’it iha sentru informasaun suku, nune’e sira bele pasa ba mídia nasionál no transmite tutan hodi komunidade sira bele akompaña nafatin,” governante ne’e dehan.

Programa Naroman ba Suku nu’udar programa pilotu hosi VIII Governu Konstitusionál liuhosi SEKOMS, ho objetivu atu promove asesu ba informasaun iha suku rurál no hakbiit komunidade sira-nia kapasidade asesu ba informasaun.

Programa ne’e buka atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu hodi aprezenta ba meiu komunikasaun nasionál sira.

Enkuantu, iha loron 29 maiu 2019, SEKOMS lansa rádiu streaming online ba Rádiu Komunidade 14 ho sítiu eletróniku hanesan  Rádiu Komunidade Liquiçá ho nia sítiu www.radiotokodede.org, Rádiu Komunidade Lospalos (www.radiolospalosvoxpopuly.org), Rádiu Komunidade Comoro, Dili, (www.radiocomoro.org), Rádiu Komunidade  Oé-Cusse (www.radioatonilifau.org), Rádiu Komunidade Ermera (www.radio-cafe.org), (www.rcc.tl), Rádiu Komunidade  Manufahi  (www.radio1912.org), Rádiu Komunidade  Manatuto, (www.radioiliwai.org), Rádiu Komunidade Baucau (www.radiomatebian.org), Rádiu Komunidade Maliana (www.radiomaliana.org), Rádiu Komunidade Maubise-Ainaro (www.radiomauloko.org), Rádiu Komunidade Viqueque (www.radiopovuviqueque.org), Rádiu Komunidade Aileu (www.radiohusar.org), no mós Radiu Komunidade Bucoli-Baucau (www.sahebucoli.org).

Jornalita : Natalino Costa

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here