Komunidade Comoro halibur iha loja hodi troka voucher ho produtu Cesta Bázika, segunda (04/01). Imajen TATOLI/António Gonçalves

DILI, 01 outubru 2021 (TATOLI)-Populasaun hamutuk uma-kain 60-resin iha suku Comoro Dili, sesta ne’e hato’o protesta hasoru Ministériu Komérsiu no Indústria (MTCI-sigla portugés)tanba sira-nia naran laiha lista distribuisaun cesta bázika.

Komunidade uma-kain 60-resin ne’e maihosi aldeia Aimutin, Moris Foun, 12 de Outobru, 30 de Agostu no Ramelau Delta, hato’o sira-nia protesta hasoru Governu no kompañia distribuidór ne’e bainhira marka prezensa iha sede suku Comoro atu simu cesta bázika.

Notísia Relevante:Reklamante 148 iha Comoro simu Cesta bázika

“Ohin ami-nia delegadu hosi Aldeia Aimutin nian fó avizu katak ohin ami mai atu simu cesta bázika maibé ami to’o mai naran laiha, uma-kain hosi aldeia Aimutin ne’ebé tama reklamante ne’e hamutuk 35 maibé ohin naran uma-kain rua de’it mak sai,” benefisiáriu Rosa Maria Ribeiro Caldas, informa ba Tatoli, iha Comoro.

Hatan ba lamentasaun ne’e, responsavel ba programa cesta bázika husi MTKI, Nilton Soares hateten MTKI la responsabiliza kona-ba dadus reklamante sira-nian tanba MTKI simu tutan dadus reklamante husi Ministériu Koordenadór ba Asuntu Ekonómiku (MKAE).

“Ami mai bazeia ba lista ne’ebé ami simu maibé ohin to’o mai ema barak mak naran laiha entaun ami deside la fahe sasán ba komunidade ami lori fali dadus sira ne’e bainhihra los ona mak ami mai fahe fali,” nia hateten.

Nune’e mós xefe suku Comoro postu administrativu Don Aleixo munisípiu Dili, Eurico da Costa de Jesus informa fallansu ne’e mosu tanba antes ne’e Governu hamutuk ho kompãnia distribudór sira distribui diretamente ba komunidade sira no la liuhosi aldeia no suku.

“Entaun reklamasaun ne’ebé ita halo ne’e sente la la’o tuir nia dalan tanba xefe aldeia sira mós lista loloos la haruka mai entaun ikus mai rezultadu naran balun la sai,” nia hateten.

Autoridade lokál ne’e promete ona sei koordena ho Governu no kompañia atu rezolve faillansu ne’ebé maka mosu nune’e komunidade sira bele simu ona sira-nia diretu.

“Maibé ita halo esforsu nune’e sira ne’ebé naran laiha prosesu fali atu ita-nia komunidade hetan hotu sira-nia direitu tanba ohin loloos ne’e aldeia neen hosi Suku Comoro simu hotu cesta bázika maibé tanba aldeia lima komunidade balun naran laiha entaun ohin aldeia Golgota de’it mak simu uluk tanba sira prontu atu simu sira-nia direitu,” nia hateten.

Notísia Relevante:Reklamante 24 iha Aldeia Ramelau seidauk simu Cesta Bázika

Jornalista: Arminda Fonseca

Editór: Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here