Estudante no profesora iha Canossa, marka prezensa iha loron dahuluk aula prezensiál, segunda (20/09). Imajen TATOLI/António Gonçalves.

DILI, 01 outubru (TATOLI)–Diretór Servisu Edukasaun munisípiu Dili, Duarte Bragansa, hateten, profesór 211 hosi eskola iha Dili seidauk simu vasina, maibé profesór sira iha eskola hirak ne’e 80% mak simu ona vasina.

“Profesór sira ne’ebé seidauk hetan vasina, ninia númeru la barak ona. Tanba eskola 199 iha Dili, kuaze sira-nia númeru vasinasaun atinje hotu ona 80% ba leten. Tuir dadus, profesór pur volta 211 mak seidauk vasina, ne’e mós la’ós mai hosi eskola 199, balun hetan na’in-rua ba leten,” Diretór Servisu Edukasaun informa ba Agência TATOLI, iha ninia knaar fatin, Comoro, sesta ne’e.

Totál profesór inklui funsionáriu administrasaun iha eskola ensinu báziku to’o sekundáriu jerál hamutuk 1.152, ne’ebé kompostu hosi profesór iha sekundáriu jerál na’in-474 no profesór iha ensinu báziku na’in-678.

“Hosi númeru profesór hirak ne’e, na’in-941 simu ona vasina no na’in 211 seidauk vasina. Totál profesór ne’ebé simu ona vasina ne’e kompostu hosi profesór hosi ensinu sekundáriu na’in-444 no ensinu báziku na’in-497,” Diretór akresenta.

Notísia relevante: MEJD autoriza eskola 99 iha Dili reativa aula prezensiál

Profesór na’in-221 ne’ebé seidauk vasina, kompostu hosi profesór ensinu sekundáriu jerál na’in-30 no ensinu báziku na’in-181.

“Tuir dadus, profesór sira ne’ebé seidauk vasina tanba moras no balun ulun to’os oituan,” nia hatutan.

Tuir Diretór Servisu Edukasaun munisipál ne’e, profesór sira ne’ebé seidauk hetan vasina tanba moras, maibé presiza halo deklarasaun, atu nune’e ministériu bele submete ba Komisaun Funsaun Públika (KFP) bazeia ba despaixu.

Enkuantu, profesór sira ne’ebé moras, bainhira tama iha resintu eskola, tenki halo teste swab iha kada semana rua.

“Agora profesór ulun fatuk to’os ne’ebé lakohi vasina, sira tenki prienxe deklarasaun hafoin submete ba KFP atu haree asuntu ne’e. Desizaun ne’e iha KFP nia liman, bainhira funsionáriu públiku ida lakohi koopera, entaun ami kanaliza problema sira tuir nia dalan atubele iha liña koordenasaun,” nia dehan.

Iha fatin ketak, Ministru Edukasaun Juventude no Desportu, Armindo Maia, hateten, profesór ne’ebé lakohi simu vasina ho razaun oioin, parte minitériu konsidera maibé iha tempu oportunu tenke simu vasina.

“Ami konsidera razaun sira ne’e, maibé ami husu atu labele kleur demais tanba labarik sira mós presiza tama eskola atu hetan matéria,” Ministru dehan foin lalais ne’e.

Tuir Ministru, Governu lakohi prejudika futuru estudante sira tanba de’it profesór ida ka rua  lakohi simu vasina.

“Ministériu Edukasaun Juventude no Desportu sei haree didi’ak atu buka hatene tanba saida maka profesór sira ne’e lakohi vasina. Sé sira funsionáriu públiku, ita sei entrega ba Komisaun Funsaun Públika, maibé kuandu profesór kontratadu no simu saláriu hosi Ministériu, ita sei halo tratamentu espesiál ba sira, ami mós sei haree profesór voluntáriu sira tanba bainhira atu loke rekrutamentu iha ona kritéria sira,” nia hatutan.

Iha inísiu, MEJD autoriza ona eskola hamutuk 99 iha Dili mak reativa ona aula prezensiál, maibé agora kuaze eskola hotu reativa ona.

“Husu ba profesór-sira ne’ebé seidauk simu vasina, atu hakbesik-an ba sentru saúde ne’ebé besik atu hetan vasinasaun hodi tulun fali estudante sira iha aula prezensiál,” Ministru enkoraja.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here