Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 01 outubru 2021 (TATOLI)-Polísia Nasionál Timor-Leste (PNTL), liuhosi komandu munisípiu Dili, detein suspeitu na’in tolu ho insiál JDS, JB, JFDS, tanba hala’o atividade jogu ilísitu.

Ekipa investigasaun kriminál komandu munisípiu Dili iha loron kinta 30/09/2021, tuku 11:20  otl    kalan halo operasaun hodi detein suspeitu sira tanba  hala’o hela atividade  jogu ‘bola guling’  iha bairu Metilaran Delta 4, aldeia São José, suku Comoro, postu administrativu Dom Aleixo.

Polísia  rekoilla mós evidénsia hanesan meza bola guling, watermak no osan $1.322 dolár amerikanu. “Suspeitu sira hala’o atividade  ilísitu ka bolu gulin no dadaun detein hela iha sela kontinua prosesu bainhira kompleta oras 72 nian laran sei aprezenta  ba Ministériu Públiku,”  Komandante PNTL, munisípiu Dili, Superintendente Xefe, Henrique da Costa, hateten ba jornalista sira iha kna’ar fatin,Caicoli, sesta ne’e.

Suspeitu sira ne’e   kontra krime  explorasaun ba jogu ilísitu ne’ebé previstu iha artigu  322  iha kódigu penál.

Hosi artigu  ne’e deskreve iha alinea 1 katak, ema ne’ebé, oin naran ida, explora jogu fortuna ka azár iha fatin ne’ebé la’ós sira-ne’ebé lei autoriza no laiha autorizasaun legál devida ka asegura sorte no erru,  enganu ka ekipamentu naran ida, sei hetan pena prizaun to’o tinan tolu ka multa.

No, alinea 2, jogu fortuna ka azár maka sira ne’ebé iha rezultadu insertu tanba bazeia de’it ka liu-liu iha sorte.

Polísia kontinua halo operasaun ba jogu ilísitu iha kapitál Dili bainhira identifika mak sei prosesu tuir lei.

Notísia relevante:MTKI-PNTL asina MoU kontrola jogu ilegál 

Jornalista: Nelson de Sousa

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here