Sekretáriu Estadu Komunikasaun Sosiál, Merício Juvinal dos Reis ‘Akara’, halo lansamentu mídia munisipál no entrega Relatóriu Planu Estratéjiku SEKOMS liuhosi Diresaun Nasionál Promosaun no Dezenvolvimentu Mídia Lokál ba autoridade munisipál sira, iha Hotel Timor, sesta (01/10). Imajen TATOLI/Egas Cristóvão

DILI, 01 outubru  2021 (TATOLI)–Sekretaria Estadu Komunikasaun Sosiál (SEKOMS) realiza semináriu nasionál ho tema ‘importánsia no papél mídia munisipál ba desentralizasaun no dezenvolvimentu munisipál, no biban ne’e halo lansamentu mídia munisipál, ne’ebé munisípiu haat sai pilotu ba programa ne’e.

“Ita fasilita internet hotu atu komunidade bele asesu mídia online sira no ita hakarak bele atinje 70%, maibé sei implementa fazeadamente no munisípiu Bobonaro, Lautém, Aileu no Manufahi sai pilotu ba programa ne’e,” Sekretáriu Estadu Komunikasaun Sosiál, Merício Juvinal dos Reis ‘Akara’, hateten iha ámbitu semináriu nasionál, iha Hotel Timor, sesta ne’e.

Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

Tuir governante ne’e, semináriu nu’udar parte inísiu atu hahú dezenvolve mídia munisipál.

“Ita sei diskute importánsia hosi mídia munisipál, oinsá atu harii, ninia implementasaun, lejizlasaun, kolaborasaun ho ministériu no autoridade munisipál,” nia akresenta.

Sekretáriu Estadu mós rekoñese, presiza diversifika meiu komunikasaun online ho plataforma dijitál, la’ós meiu komunikasaun konvensionál de’it ka rádiu no televizaun.

Notísia relevante: SEKOMS selebra akordu transferénsia públiku daruak ba Rádiu Komunidade 16

“Ita fasilita membru Governu tama-sai suku atu atualiza atividade governativa, ne’ebé objetivu prinsipál mak informasaun bele to’o ita-nia sidadaun no bele asesu liuhosi plataforma saida de’it, tantu mídia estatál no mídia privadu,” nia hatutan.

Prezidente Agência TATOLI,I.P, Manuel Pinto, entrega entrega Relatóriu Planu Estratéjiku SEKOMS liuhosi Diresaun Nasionál Promosaun no Dezenvolvimentu Mídia Lokál ba autoridade munisipál sira, iha Hotel Timor, sesta (01/10). Imajen TATOLI/Egas Cristóvão

Iha fatin hanesan, Administradór munisípiu Manufahi, Arantes Isaac Sarmento, konsidera semináriu ne’e importante tanba liuhosi biban ne’e bele hetan informasaun barak, nune’e mós dezenvolve mídia munisipál.

“Ha’u hanoin mídia ne’e importante atubele ajuda transmite informasaun kona-ba atividade saida de’it ne’ebé mak Governu ka munisípiu hala’o ba komunidade, atu nune’e komunidade bele iha informasaun kle’an atu kontribui ba dezenvolvimentu munisípiu ida,” nia hatutan.

Ba Arantes, mídia nia papél importante ba polítika desentralizasaun hosi aspetu hotu, ne’ebé kontribui aleinde ba aspetu ekonomia, sosiál, seguransa no dezenvolvimentu.

“Mídia importante tanba kuandu iha atividade ruma iha munisípiu, dalaruma ema la hatene, tanba ne’e mídia importante atubele ajuda divulga informasaun ba komunidade,” nia dehan.

Biban ne’e, SEKOMS lansa Relatóriu Planu Estratéjiku SEKOMS liuhosi Diresaun Nasionál Promosaun no Dezenvolvimentu Mídia Lokál (DNPDML).

Semináriu nasionál ho tema ‘importánsia no papél mídia munisipál ba desentralizasaun no dezenvolvimentu munisipál, iha Hotel Timor, sesta (01/10). Imajen TATOLI/Egas Cristóvão

DNPDML hanesan diresaun foun iha tinan ne’e, ne’ebé antes hanesan Sentru Rádiu Komunidadade (CRC, sigla portugés), no diresaun ne’e tutela ba SEKOMS.

Diresaun ne’e mosu atu dezenvolve mídia iha munisípiu, hanesan polítika SEKOMS ne’ebé hakarak konsentra hamutuk autoridade munisipál dezenvolve sentru mídia atu diversifika meiu komunikasaun sosiál iha área rurál.

DNPDML halo programa boot tolu hanesan kontinua fó asisténsia ba Rádiu Komunidade liuhosi transferénsia públika, inísia implementasaun mídia lokál no programa Naroman ba Suku.

Antes ne’e, SEKOMS liuhosi DNPDML fó apoiu fundu hosi transferénsia públika ba Rádiu Komunidade 16 iha Timór laran tomak, ne’ebé kada rádiu simu $8.000 hodi finansia atividade produsaun notísia lokál, notísia online, talk show, produsaun teatru ka drama no produsaun mensajen badak sira, durante tinan ida.

Jornalista : Natalino Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here