Médiku sira kontinua halo atendimentu ba komunidade ne’ebé hakarak hetan Vasina AstraZeneca no Sinovac iha Centru Saude Bairrru Formosa, Dili, kuarta (29/09/21). Imajen Tatoli/António Gonçalves.

COVALIMA, 01 outubru 2021 (TATOLI)—Ministériu Juventude no Desportu (MEJD) hasai ona sirkulár ida hodi enkoraja profesór sira atu simu vasina, maibé ba profesór sira-ne’ebè la kontribui ka lakohi simu vasina entaun minsitériu edukasaun sei hapara.

Notísia Relevante: Vasina 80%, MEJD hato’o parabens ba serbisu edukasaun Bobonaro

“Profesór sira-ne’ebè lakohi simu vasina ne’e, ministériu edukasaun sei hapara sira.  Ita labele ko’alia lei tanba vasina ne’e hanesan programa hosi nasionál. Ita mós hasai ona sirkular no Komisaun Funsaun Públika (KFP) rasik hasai ona sirkulár kona-bá ida-ne’e,” Vise-Ministru Edukasaun Juventude no Desportu, António Guterres, hateten ba jornalista sira iha aldeia Natardik, suku Dato Tolu, postu administrativu Fohorem, sesta ne’e.

Governante ne’e hateten, nu’udar funsionáriu públika ne’ebé servi públiku, profesór sira obrigatóriamente tenke simu vasina tanba profesór sira iha nasional, simu vasina atinje ona 89% no iha Covalima atinje ona 97%.

“Populasaun sira iha postu administrativu Fohorem rasik ne’e, simu vasina atinje ona 97%, tanba  profesór sira-ne’ebé simu ona vasina ne’e hamutuk na’in-90 ona,” nia dehan.

Diretór Eskola Bázika Central Dato Tolu, Adão da Costa, hateten tuir sirkulár ne’ebè dsitribui hosi Ministériu Edukasaun Juventude no Desportu (MEJD) haktuir katak profesór sira obrigatóriamente tenke simu vasina.

“Ami simu orientasaun hosi Ministériu Edukasaun Juventude no Desportu no Edukasaun Munisípiu Covalima katak, profesór hotu tenke simu vasina tanba eskola akumula ema barak ne’ebé virus (COVID-19) fasil atu da’et ba estudante sira,” nia hateten.

Hafoin simu orientasaun hosi MEJD, Eskola Bázika Sentrál ne’e fó keda orientasaun ba profesór sira atu kontribui hodi kombate COVID-19 liuhosi simu vasina.

“Profesór sira lakohi simu vasina, ami la autoriza profesór sira tama sala-de-aula atu fó-hanorin estudante sira no ami konsidera sira falta. Ami konsege konvense ami-nia profesór iha EBC Dato Tolo hamutuk 33 simu hotu ona vasina,” nia dehan.

Diretór Edukasaun Munisípiu Covalima, Edmundo Pereira, informa tuir dadus provizóriu hosi Edukasaun Munisípiu Covalima, profesór sira-ne’ebé simu ona vasina ne’e hamutuk 10.47.

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here