Pesoál saúde atende hela pasiente pozitivu COVID-19 hodi transporta ba fatin izolamentu iha Dili, tersa (08/06/21). Imajen Tatoli/António Gonçalves.

Servisu saúde munisípiu Bobonaro presiza kontribuisaun hosi Autoridade lokál, xefe aldeia no komunidade, nune’e bele kombate kontajia Covid-19,iha munisípiu Bobonaro

BOBONARO, 01 outubru 2021 (TATOLI)-Joven na’in tolu detetadu pozitivu Covid-19, lakoi kopera ho parte saúde hodi kumpre protokolu saúde no oras ne’e la’o livre hela iha kapitál Maliana, munisípiu Bobonaro, Diretór servisu saúde munisípiu Bobonaro, João Barreto Cardoso informa.

“Iha semana liubá kotuk iha tersa ne’e ita-nia ekipa vizilánsia halo teste ba sidadaun na’in tolu dehan atu viajen ba Dili, mas depois rezultadu ne’e sai detekta sira pozitivu. Ita kontaktu sira  atu lori ba izolamentu maibé nia númeru mate, laiha kontaktu kedas to’o agora” Diretór ne’e informa ba jornalista sira,iha Salaun CNE munisípiu Bobonaro, sesta ne’e.

Ezekutivu ne’e haktuir, sidadaun na’in tolu ne’e ho estatu klosan, no hela iha postu administrativu Maliana, na’in ida hela iha suku Holsa, ida iha  Lahomea no ida iha suku Lahomea.

Hafoin de rezultadu amostra PCR deteka sidadaun na’in tolu ne’e positivu,ekipa vizilánsia epidimologia Covid-19 munisípiu Bobonaro halo kedas esforsu hodi buka tuir sidadaun na’in tolu ne’e ninia paradeiru maibé la konsege identifika.

“Ita halo ona kontaktu ho ema ruma besik ho sira,ida parte Lahomea nia ekipa tenta husu iha xefe aldeia maibé sira taka malu dehan la koñese ema sira ne’e prontu ita-nia esforsu mak nune” Nia dehan

Diretór  João Barreto husu ba Autoridade lokál no komunidade atu kopera ho saúde, buka tuir joven na’in tolu ne’e no bainhira identifika joven na’in  tolu ne’e ninia paradeiru  pasa kedas informasaun ba Ekipa Vijilánsia epidemologia munisípiu Bobonaro, nune bele lori ba kumpre protokolu saúde iha fasilidade ne’ebé governu prepara.

“Se ita lakoi fó informasaun klaru ba ita-nia ekipa saúde sira, posiblidade bele akontese transimisaun komunitaria, tanba sira la’o livre, kaer-liman, halibur malu hamutuk ho ema barak, ne’e fo risku boot,” Nia dehan

Atu detekta joven na’in tolu ne’e ninia paradeiru, tuir ezekutivu ne’e katak servisu saúde munisípiu Bobonaro presiza kontribuisaun hosi Autoridade lokál, xefe aldeia no komunidade, nune’e bele kombate kontajia Covid-19,iha munisípiu Bobonaro.

Entertantu, dadaun ne’e iha Bobonaro, sidadaun na’in 23 kumpre izolamentu iha Amazon Maliana, no ospitál referál Maliana no kumpre hela kuarentena iha Batugade, postu administrativu Balibo hamutuk ema na’in 26.

Evolusaun Covid-19 munisípiu Bobonaro,iha Loron 01 fulan outubru ne’e detetadu kazu foun ha’at, rekoperadu laiha, no kazu ativu 67, komulativu kazu rekoperadu 505, komulativu kazu komfirmadu 581, komulativu óbitu sia.

Enkuantu total persentazen vasina iha Munisípiu Bobonaro, iha loron 01 outubru doze dahuluk 42,7% no doze kompletu 15,8%.

Jornalista: Sérgio da Cruz

Editor: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here