Pesoál saúde-sira hala’o preparasaun molok teste swab Covid-19 ba komunidade iha Sentru Integradu Jestaun Krize (SIJK), kuarta (25/08/21). Imajen Tatoli/António Gonçalves.

DILI,01 outubru   2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 37,  rekuperadu 56, no kazu ativu 744.

“Kazu foun ohin 37.  Hosi Dili na’in sanolu, Baucau 20, no munisípiu seluk hamutuk na’in hitu  ne’ebé kompostu hosi mane sanolu, feto 27,’’ Kordenadór Forsa-Tarefa ba Prevensaun no Mitigasaun, Rui Maria de Araújo hateten liuhosi komunikadu, sesta ne’e.

Hosi totál kazu detetadu foun ohin, ho idade 20, na’in 7 (18,9%) ho idade entre tinan 12-59 na’in 28 (75,6%), idade 60   na’in rua. Husi kazu detetadu foun ohin 14 kazu  ka 37,8% sintomatiku (hatudu sintoma).

Kumulativu kazu konfirmadu sura hosi 21 marsu 2020 to’o   01 outubru  2021 hamutuk 19.535. Hosi horisehik mai ohin, teste ne’ebé Laboratóriu Nasionál Saúde halo hamutuk 209, PCR, ho detallu hanesan tuir-mai, Vijilánsia sentinela na’in  ida, rastreiu ba kontaktu ka Contact tracing ida,  Rastreiu Aleatóriu  ka Random Screening na’in 36, viájen sai-hosi serka sanitária hosi Dili 11,  Viájen internasionál  149 , Follow up iha kuarentena na’in 11.

Totál teste PCR ne’ebé halo horisehik 30 setembru iha munisípiu-sira seluk, RAEOA no HNGV hamutuk 242, ho  detalla hanesan tuir-mai, Maubisse 17, Maliana 10, Viqueque  la iha, Suai 18, Baucau 65,  Ermera lima,  RAEOA 23, HNGV 67, Lospalos 37.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10h00,  loron 01 outubru tuir sistema informasaun Saúde iha Ministériu Saúde  totál  kumulativu 1ª doze iha Dili (78,5%). No  totál  kumulativu 2ª doze  iha Dili (68,4%). No, ema ne’ebé simu ona vasina doze dahuluk iha Timor-Leste  (59,8%).No simu ona doze daruak  (37,2%).

Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-nain epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 2,5/100 mil abitante,  enkuantu ba deit munisípiu Dili 4,1/100 mil abitante.

Ohin, Baucau iha insidénsia 8,3/100 mil abitante no RAEOA iha insidénsia 5,0/100 mil. Dadus iha leten hatudu katak  insidénsia munisípiu Dili, munisípiu Baucau  no RAEOA tuir-tuir malu aas-liu, iha Timor-Leste laran tomak  hatudu risku aas-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron  01 outubru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu na’in 37,  ho detalle hanesan tuirmai; grave hamutuk na’in  lima, na’in  ida uza ventiladór, na’in rua uza  CPAP continuous positive Airway pressure, na’in rua uza oksijeniu. Moderadu hamutuk ema na’in 25. Kaman ema na’in hamutuk hitu.

Informa bá públiku katak hahú 30 setembru 2022, Governu hakotu ona serka sanitária iha munisípiu Dili. Nune’e, sidadaun sira bele ona sirkula livremente sai/ka tama Munisípiu Dili, maibé tenki nafatin kumpri regra prevensaun & ijiéne pesoal hanesan: uza máskara, fase-liman bebeik ho bee no sabaun ka ho dezinfetante ruma, mantein distánsia mínimu metru ida ho bandu, evita halibur malu barak.

Aproveita hato’o mós ba públiku katak, fatin atu halo teste PCR maka bainhira sente moras isin-manas, me’ar, kakorok moras ka sintoma seluktan  bele ba konsulta iha Sentru Saúde ne’ebé besik, atu bele halo swab bainhira atu husu autorizasaun esepsionál sai husi no tama serka sanitária iha Dili bele ba halo swab iha Centro Convenções Dili (CCD). Bainhira sente katak sai kontaktu-besik ba ema ruma ne’ebé detetadu pozitivu ona, no seidauk hetan kontaktu husi ekipa konjunta saúde bele liga ba númeru 119 atu organiza oinsá foti swab.

 Husu kompriensaun no pasiénsia populasaun iha Timor-Leste laran tomak, atu kolabora no kontribui hodi vírus SARS-CoV-2, inkui variante Delta, labele hada’et ba ema barak liu tán. Favor hela iha uma, bainhira la presiza atu sai. Apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde Sentru Saúde ka ospitál ne’ebé besik, bainhira sente isin-manas, ka kakorok moras, ka inus-been, ka me’ar, hodi bele hetan atendimentu husi profisionál saúde sira. Bainhira sedu liu, hatene se virus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran Sindroma Insufisiénsia Respiratória Aguda (SIRA), ka susar/difisil atu dada-iis.

Ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatuur ona, atu prevene moras COVID-19 da’et ba mai. Regra sira ne’e, hanesan ita hotu hatene ona, maka uza máskara fase-liman beibeik ho sabaun ka dezinfetante ruma,  evita kose-liman ba matan, inus ho ibun  bainhira kumprimenta malu, la presiza ka’er-liman, bensa-liman, rei-malu ka haku’ak malu, evita halibur-malu barak,  hamriik ka tur do’ok husi ema seluk, mínimu metru ida ho balu.

Notísia relevante:COVID-19 iha RAEOA: pozitivu neen, ativu 31 no rekoperadu 291

Jornalista: Felicidade Ximenes

Editór : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here