Sekretáriu Rejionál Asuntu Agrikultura, Jose Eta. Imajen TATOLI/Abílio Elo Nini.

OÉ-CUSSE, 01 outubru 2021 (TATOLI)—Autoridade RAEOA liuhsoi Sekkretáriu Rejionál Asuntu Agrikultura sei fasilita ekipamentu ba grupu no pesoál peskadór sira, nu’udar rekoperasaun peska hodi responde siklone tropikál seroja ne’ebé akontese iha 4 abril liubá ne’e.

“Relasiona ho akontesimentu inundasaun siklone tropikál seroja iha 4 abril liubá, autoridade RAEOA liuhosi Sekretáriu Rejionál Asuntu Agrikultura deside ona atu halo rekoperasaun ba área peska, atu oferese apoiu fasilidade ba parte peska liu-liu peskadór sira. Apoiu ne’e ita sei halo iha tempu badak tanba nia orsamentu autoridade alokadu tiha ona hamutuk rihun $40,” Sekkretáriu Rejionál Asuntu Agrikultura, José Eta, informa ba Agência Tatoli iha Horta, Oé-Cusse, sesta ne’e.

Ekipamentu ne’ebé atu distribui ba peskadór sira mak makina ketintin, rede ho jongsong ida, atu fasilita peskadór sira hodi organiza malu didi’ak, grupu sira hosi fronteira Sakato, sub-rejiaun Pante Makasar to’o fronteira Citrana, sub-rejiaun Nitibe.

Politika ne’e, intensaun autoridade nian hakarak funsiona hikas lotas peska nian tanba paradu tinan barak ona. Tanba ne’e, atu re-ativa fali Dirasaun Agrikultura sei prepara kontainer rua atu tau iha lotas de peskas ne’e, nune’e movimentu peskadór hotu-hotu nia rezultadu peska sei submete ba iha lotas de peskas, nune’e bele organiza didi’ak, hodi fahe kna’ar hanesan balun ba faan no balun mantein iha tasi laran.

Nia informa, daudaun ne’e Dirasaun Rejionál Agrikultura RAEOA servisu hamutuk ho Ministériu Agrikultura no Peska (MAP) destaka ona funsionáriu na’in-rua (2) iha Oé-Cusse, hahú halo ona levantamentu dadus atu rekolla númeru peskadór temporariu no permanente.

Tuir dadus ne’ebé Dirasaun Agrikultura rekolla kada tinan, rendiemntu atividade peska sufisiente tanba kada peskadór nia rendimentu kada fulan bele $500 to’o $1000, entaun estratejiku atu jere di’ak liután hodi kontribui ba kofre Estadu, tenke utiliza lotas de peskas ne’ebé mak iha tanba ne’e investimentu Estadu nian no regra no padraun Dirasaun Rejionál Agrikultura prepara ona.

Entretantu, tuir dadus provizoriu grupu peskadór iha RAEOA hamutuk 20 no peskadór pesoál hamutuk 89, ne’ebé eziste iha no hala’o atividade peska hosi tasi fronteira Sakato, sub-rejiaun Pante Makasar to’o tasi fronteira Citrana, suku Bene-Ufe, sub-rejiaun Nitibe.

Jornalista : Abilio Elo Nini

Editor       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here