Ikan Tilapia/Nila. Imajen/ Tatoli Egas Cristovao

OÉ-CUSSE, 01 outubru 2021 (TATOLI)—Sekretáriu Rejionál Asuntu Agrikultura, José Eta informa, hosi janeiru to’o setembru 2021 autoridade RAEOA liuhosi Departamentu Peska apoia no distribui ona fini ikan Nila (Tilapia) ba grupu agrikultor-hitu (7) atu hakiak.

“Iha tinan ne’e, ami distribui ona fini ikan Nila ba komunidade ne’ebé halo agrupamentu hamutuk grupu hitu (7) ho totál fini ikan Nila hamutuk rihun-ida,” José Eta informa ba Agência Tatoli iha Horta, Oé-Cusse, sesta ne’e.

Daudaun ne’e, nia dehan, grupu agrikultór seluk hosi sub-rejiaun Nitibe no Pasabe submete ona sira-nia pedidu atu apoiu fini ikan, entaun iha tempu badak autoridade RAEOA sei distribui tán fini ikan ba sira iha baze hodi halo atividade peska.

Aleinde ne’e, Dirasaun Agrikultura uza sentru haki’ak ikan nian halo atividade negósiu hodi faan ikan ho nia redimentu hamutuk $700, no rendimentu ne’e uza ba atividade rutina hanesan atividade operasaun peska no manutensaun ba fatin inklui hola hahan ba ikan sira.

“Progresu ne’ebé autoridade RAEOA distribui fini ikan ba komunidade, ekipa téknika sira hosi Departamentu Peska halo observasaun, prinsipálmente, ba grupu sira-ne’ebé hetan ona apoiu ne’e, maiória uza ikan sira-n’e ba konsumu,” nia dehan.

Iha grupu balun, nia dehan, rezulatdu hakiak ikan ne’e balun faan iha merkadu maibé ninia eskala kiik liu.

Maibé, tuir nia, importante mak bele ajuda grupu sira bele operasionaliza sira-nia atividade peska, nune’e nia impaktu ba setór saúde kontribui mós ba redúsaun númeru má-nutrisaun. 

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here