EmbaixadórUniaun Europeia ba Timor-Leste, Andrew Jacobs, lansa ona filme 4 ne'ebé koa'lia kona-ba importansia hosi ai-horis sira ba mitigasaun agroflorestál. Iha Metiau Rejidensia Ramos Horta, kuarta (29/09). Imajen Tatoli/Francisco Sony

DILI, 30 setembru 2021 (TATOLI)-Uniaun Europeia (UE) kuarta (20/09) ne’e halo ona lansamentu ba filme haat kompostu husi dokumentáriu tolu no Making of ida kona-ba importánsia hosi ai-hun sira ba mitigasaun agroflorestál no mudansa klimátika.

Tuir komunikadu imprensa ne’ebé maka Tatoli asesu hateten Istória hosi Filme ne’e mak ko’alia kona-ba importánsia ai-hun sira nian iha kultura tradisionál ho mensajen inspiradu ida kona-ba oinsá komunidade lokál sira, ho sira-nia matenek fó valór no servisu maka’as atu proteje no dezenvolve ai-laran sira iha Timor-Leste.

Ho kontribuisaun komunidade sira-nian maka hodi halo mitigasaun no adaptasaun ba alterasaun klimátika sira, ne’ebé iha Uniaun Europeia nian Akordu Matak (EUGreen Deal) nia laran.

Embaixadór Uniaun Europeia ba Timor-Leste, Andrew Jacobs, agradese ba Eis Prezidente Repúblika José Manuel Ramos Horta tanba bele simu sira hodi halo lansamentu filme iha ninia rezidénsia.

Nia fiar katak filme ne’e sei fó entertenamentu  hodi fó inspirasaun ba ema hotu atu iha konsiensia hodi protégé ai-horis iha Timor-Leste. Tanba ai-hun sira nu’udar rekursu ida ne’ébe bele jere rendimentu lokál, kria kampu traballu no buka moris foun.

No, ai sira ne’e mós nu’udar asset ida ne’ebé bele uza globálmente ba komérsiu emisaun no mitigasaun mudansa klimátika.

Entertantu, Filme haat ne’ebé lansa ne’e mak “Oan-Mane hosi Manukoko, Guarda hosi Ai-hun sira” hosi Bernardino Soares, “Ai Ba Moris” hosi Tom Hill, “Ai-hun Tolu, istória Tolu” hosi Lena Lenze no Making of “istória tolu, nasaun ida, Timor-Leste Furak” hosi Jawad Rayyan.

Uniaun Europeia iha ona planu sei halo ezibisaun ba filme hirak ne’e iha Laclubar Munisípiu Manatuto no Ataúro Munisípiu Dili.

Meius ezibisaun seluk maka liuhosi forma roadshow hodi fó entertenamentu atu fó informasaun ba populasaun sira iha Munisípiu ho projetu PSAF-Ai Ba Futuru iha alvu ba Munisípiu Dili, Lautem, Ermera no Manatuto.

Nune’e filme ne’e haruka ona ba festival sinema internasionál sira  ne’ebé iha relasaun ho meiu ambiente no mudansa klimátika, hanesan “Filme Krize Klimátika”, ne’ebé sei hala’o tuir okaziaun COP 26, iha Glasgow, Eskósia, no ba “Festival Film Independente Jakarta nian iha Indonézia. Hosi filme sira ne’e ida mak selesionadu ona ba Festival Filme iha España.

Eventu husi lansamentu ne’e hala’o iha rezidénsia Prémiu Nobel da Pás no Eis-Prezidente Repúblika, Ramos-Horta, iha Metiaut, Dili.

Filme hirak ne’e prodús ho apoiu hosi “Parseria ba Agroflorestál Sustentável (PSAF)/Ai ba Futuru”, ne’ebé hetan finansiamentu hosi Uniaun Europeia no Ministériu Kooperasaun no Dezenvolvimentu Ekonómiku Alemaña (BMZ).

Jornalista : Arminda Fonseca

Editór : Agapito dos Santos

HAKEREK NO HATÁN

Please enter your comment!
Please enter your name here