Mesjid An’nur, kampung Alor, Dili. Imajen Tatoli/António Gonçalves

DILI, 30 agostu 2021 (TATOLI)-Xefe Fundasaun Meskita Annur, Dili, Muhamad Anwar da Costa, hateten, toleránsia entre relijiaun sira iha Timor-Leste, la’o di’ak tebes maske izlam nu’udar relijiaun ne’ebé ho pursentajen kiik liu.

“Ha’u apresia tebes Timor-Leste maske kristaun nu’udar relijiaun ne’ebé boot maibé relijiaun ida-idak hala’o nia servisu ho di’ak la hamosu diskriminasaun entre relijiaun,” Muhamad dehan iha salaun Tower Fatuhada Dili.

Mezmu ho pursentajen kiik maibé sidadaun musulmanu  sira selebra loron boot idulfitru, idul adha no reja hamutuk kada loron sesta ho livremente tanba laiha ameasa ka diskriminasaun husi relijiaun maioria hanesan  katólika.

“Ami agredese tebes hela iha Timor-Leste tanba moris nakonu ho domin no ha’u haree relijiaun hotu-hotu ne’ebé iha Timor-Leste respeita malu, tanba ne’e ha’u espera ba oin mantein nafatin hanesan ne’e, no komunidade izlámiku iha Timor-Leste daudaun ne’e ema hamutuk 10.000,” nia hateten.

Tuir dadus sensus 2015, liuhosi Diresaun Estatéstiku Ministériu Administrasaun Estatál hatudu katak populasaun iha TL to’o ona millaun 1.1 no tuir estimasaun  to’o tinan 2021 katak populasaun TL atinje ona 1.5 milliaun.

Hosi dadus populasaun 99.53% ne’e, komunidade hosi relijiaun Katólika hamutuk 97,57%, Protestante hamutuk 1,96% no relijiaun Musulmanu hamutuk 0,24% inklui relijiaun sira seluk 0,23%.

Jornalista : Arminda Fonseca

Editór : Agapito dos Santos

HAKEREK NO HATÁN

Please enter your comment!
Please enter your name here