Mapa dezenvolvimentu kampu Greater Sunrise. Imajen/Espesiál

DILI, 30 setembru 2021 (TATOLI)—Estadu Timor-Leste liuhosi Timor Gás no Petróleu, Empreza Públika (Timor GAP, E.P) daudaun ne’e serbisu maka’as hodi halo negosiasaun ho konsórsiu Woodside no Osaka Gas  hodi dezenvolve projetu kampu petrolífera Greater Sunrise.

“Ho prinsípiu ida katak projetu Greater Sunrise tenke fó benefísiu másimu ba povu no Estadu Timor-Leste,” Prezidente Konsellu Administrasaun Timor GAP, E.P, António José Loiola de Sousa, hateten, liuhosi  nota imprensa ne’ebé Agência TATOLI asesu, kinta ne’e.

Iha diálogu no sosializasaun kona-ba atualizasaun informasaun kona-ba projetu tasi mane ba komunidade no autoridade lokál iha Betano, munisípiu Manufahi, foin lalais ne’e, Prezidente Timor GAP informa katak sosa ona asaun liuhosi fundu empréstimu.

Governu anteriór sosa asaun hosi ConocoPhillips no Osaka Gas ho montante millaun $651,7, ne’ebé osan millaun $650 mai hosi empréstimu direta hosi Banku Federál Amérika no millaun  $1,7 mai hosi fundu Timor GAP nian ne’ebé mak kada tinan hetan alokasaun liuhosi Orsamentu Jerál Estadu (OJE).

Notísia relevante: BSTL Ho Timor Gap Asina Ona Protokolu Ba Transferénsia Osan Hodi Sosa Asaun

Ho nune’e, Estadu Timor-Leste iha asaun 30% ne’ebé sosa hosi kompañia ConocoPhilips no Shell hamutuk 26,56%, ho kustu  millaun $650, ne’ebé Timor GAP hanesan kompañia petrolífera nasionál iha ona partisipasaun hamutuk 56,56% iha Greater Sunrise.

“Timor GAP atualmente tenke selu ho funan 4,5% annual compound, hahú hosi 19 abríl 2019, hanesan kompañia subsidiáriu iha Greater Sunrise ho kustu $82.500 kada loron ida,” Prezidente Timor GAP akresenta.

Relasiona ho projetu Tasi Mane, Dirijente empreza estatál ne’e dehan Timor GAP refere ba padraun internasionál iha setór petrolíferu, ne’ebé projetu hotu tenke inisia uluk hosi parte upstream mai mid-stream hafoin mak to’o parte downstream.

Projetu Tasi Mane presiza asegura, katak Governu tenki hatene uluk rezerva petrolífera hira mak eziste iha tasi-laran no rai-maran, atu nune’e tuir mai bele aplika projetu Tasi Mane ne’ebé fo benefísiu másimu ba povu no Estadu.

Ho nune’e, redefinisaun ba projetu Tasi Mane sei aprezenta ba Governu atu konsidera ba ezekusaun.

Iha  ámbitu sosializasaun no dialogu ne’e, Prezidente Autoridade Nasionál Petróleu no Minerál (ANPM), Florentino Mateus Soares Ferreira, atualiza kona-ba projetu Tasi Mane ninia konseitu ne’ebé mak konsideradu nu’udar ‘projetu ne’ebé mak la tuir padraun indústria petrolífera’, tanba Governu anteriór la dezenvolve konseitu ida bazeia ba padraun internasionál ba indústria petrolífera ne’ebé mak adota iha mundu.

Prezidente ANPM aprezenta mós ba autoridade lokál no komunidade sira kona-ba ‘konseitu foun’ ne’ebé adota padraun petrolíferu internasionál, atualmente sei iha faze diskusaun atu bele konsidera hodi aplika iha Timor-Leste, liuliu setór petrolíferu iha parte Tasi Mane, nune’e tuir aspetu tékniku no komersiál, sei oferese benefísiu másimu ba povu no Estadu.

Ministru Petróleu no Minerál, Victor da Conceição Soares, aprezenta kona-ba progresu serbisu sira ne’ebé mak VIII Governu Konstitusionál atinje ona to’o ohin loron liuhosi ministériu tutela.

Programa diálogu no sosializasaun ne’e, hetan apresiasaun di’ak hosi komunidade no entidade relevante hanesan lider Komunitáriu, Administradór munisípiu, joven sira, veteranu, membru Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here