Sekretáriu Rejionál Asuntu Komérsiu no Indústria, Pedro da Cunha Boquifai. Imajen/Mídia ZEESM.

OÉ-CUSSE, 30 setembru 2021 (TATOLI)—Sekretáriu Rejionál Asuntu Komérsiu no Indústria, Pedro da Cunha Boquifai, informa durante períodu estadu emerjénsia no serka sanitária, ekipa téknika hosi Departementu Komérsiu halo identifikasuan no observasaun ba sasán nesesidade bázika ne’ebé faan iha loja, kioske no merkadu ninia folin normál

“Ita-nia ekipa halo identifikasaun no oberva fazeadamentu kada fulan ba iha merkadu tradisionál sira iha sub-rejiaun Pasabe, Oésilo, Nitibe no Pante Makasar no Oé-Cusse vila, rezultadu hatudu laiha manipulasaun ba sasán nesesidade bázika sira nia folin maibé folin normál hanesan baibain,” Pedro da Cunha Boquifai informa ba Agênsia Tatoli iha Palaban, Oé-Cusse, kinta ne’e.

Nia agradese ba negosiante sira-ne’ebé faan sasán nesesidade bázika no agradese ba líder komunitária sira hanesan xefe suku, xefe aldeia no jestór sub-rejiaun sira tanba liuhosi sira-nia kooperasaun bele garante normalizasaun folin sasán iha baze.

“Xefe suku, xefe aldeia hamutuk ho jestór sira, kontribui maka’as iha situasuan defisíl ne’e. Dadalaruma ami-nia ekipa seidauk to’o iha baze, sira mak koordena ho komunidade atu hato’o keixa ruma karik iha kioske no loja balun tenta halo manipulasaun ba folin sasán. Maibé, ita agradese tanba kooperasaun ne’e iha rezultadu laiha keixa kona-bá folin nesesidade bázika sa’e iha situasaun COVID-19 nia laran,” nia dehan.

Hosi janeiru to’o setembru ne’e, nia dehan, ekipa téknika hosi Departamentu Komérsiu konsege deteta mós nesesidade bázika balun liu prazu, maibé ne’e kompeténsia autoridade husu autorizasaun iha parte AIFAESA atu bele destroi.

Entretantu, Jestór sub-rejiaun Pasabe, Anton Ulan, konsidera atividade identifikasaun ne’e importante tanba iha situasaun pandemia COVID-19, populasaun barak ladún asesu ba merkadu, entaun presiza kontrolu másimu hosi autoridade ba sasán sira-nia folin.

“Ha’u-nia populasaun sira iha Pasabe dook no izoladu hosi Oé-Cusse, tanba ne’e presiza nafatin apoiu hosi parte autoridade atu kontinua kontrola ba folin sasán. Tanba, ha’u informa ona ba xefe suku no aldeia sira atu espalla informasaun ba komunidade atu hato’o informasaun karik deteta ema ruma tenta manipula folin sasán,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here