Deputadu sira hosi Komisaun F Parlamentu Nasionál, Deputada Lúcia Taeki, bainhira halo fiskalzisaun ba membru F-FDTL sira-ne’ebé destaka iha fronteira Mota Masin Covalima nia hela fatin. Imajen Tatoli/Celestina Teles.

COVALIMA, 30 setembru 2021 (TATOLI)—Membru FALINTIL-Forsa Defeza Timor-Leste (F-FDTL) ne’ebè destaka iha Fronteira Mota Masin Covalima, provizóriu hela iha eis merkadu ne’ebé iha situasaun pandemia COVID-19 ne’e nakfilak ba sala izolamentu.

“Ami nia kondisaun mak ita-boot sira haree rasik. Ami agora hela provizóriu okupa saúde sira nia fasilidade. Maibé, ida-ne’e la’ós difikuldade mai ami. Ami kontinua hala’o ami-nia knaar loro-loron,” Ofisiál Ligasaun F-FDTL, Tenenti Juvinal Ribeiro ba jornalista sira, hafoin deputadu sira hosi Komisaun F hosi parlamentu nasionál hala’o fiskalizaun iha Fronteira Mota Masin Covalima, kinta ne’e. 

Membru F-FDTL ne’ebè destaka iha fronteira Mota Masin Covalima ne’e kada fulan tolu, halo rotasaun ba membru sira hodi troka malu. 

Durante hala’o servisu iha forenteira ne’e, membru F-FDTL hamutuk ho membru Unidade Patrullamentu Fronteira (UPF) no Unidade Polísia Marítima (UPM) kaptura sidadaun sira-ne’ebé hakat liu fronteira ho ilegál hamutuk na’in-hitu (7) no kaptura tán sidadaun balun iha tasi ibun. 

“Kaptura sidadaun sira-ne’e la’ós ami mesak maibé ami servisu hamutuk ho PNTL liu-liu UPF no UPM, hafoin ami entrega direta ba parte saúde,” nia dehan.

Autoridade seguransa kaptura sidadaun sira-ne’ebè bainhira hala’o atividade diária iha segunda no kuarta, hodi hala’o pasa revista no atividade patrulla konjuta ne’e hala’o loro-loron. 

Sekretária Meza komisaun F Parlamentu Nasionál, Helena Martins Belo informa, fiskalizasaun  iha fronteira Mota Masin ne’e, sira mós iha prontidaun atu kolabora ho autoridade seguransa sira entaun númeru sidadaun tama-sai ilegál menus. 

“Dezafiu ne’ebè ohin sira hateten, uma ne’ebè agora halo reabilitasaun, ita espera atu finaliza lalais hodi belé entrega ba sira hodi hala’o sira-nia servisu,” Deputada Helena hateten. 

Jornalista : Celestina Teles

Editór      : Cancio Ximenes 

HAKEREK NO HATÁN

Please enter your comment!
Please enter your name here