BONONARO, 30 setembru 2021 (TATOLI)—Ministru Edukasaun Juventude no Desportu (MEJD), Armindo Maia, halo lansamentu ba sosializasaun matadalan aprendizazen distánsia, ka Eskola ba uma no Tele-eskola ba diretór no koordenadór eskola-sira, iha munisípiu Bobonaro.

Programa ne’e ho objetivu atu aumenta koñesimentu ba diretór no koordenadór-sira hotu, kona-bá programa eskola ba uma, liu-liu maneira atu sira mak bele utiliza eskola ba uma, atu ajuda estudante sira ba aprendizazen ho efetivu.

Notísia relevante:MEJD sensibiliza matadalan programa “Eskola Ba Uma” iha Covalima

“Edukasaun sai hanesan Pilar importante ba dezembolvimentu nasaun nian, tanba ne’e iha situasaun pandemia Covid-19, liu hosi dezemvolvimentu teknolojia ba informasaun no komunikasaun, estudante sira bele estuda de’it iha uma, hodi evita transmisaun Covid-19,” Armindo Maia, hateten iha ámbitu lansamentu ne’ebé realiza iha jináziu Maliana, kinta ne’e.

Maski Governu liu hosi MEJD ho Ministeriu Ensinu Superiór Siénsia no  Kultura (MESSK), esforsu atu implementa programa ne’e desde marsu 2020, maibé sei enfrenta hela problema konektividade, tanba kompañia telekomunikasaun ne’ebé fornese liña internete ladún di’ak.

“Agora Governu haree hela Cabo submariñu, parese tinan oin mai bele fasilita tan konektividade, entaun asesu ba internete ho fásil liu,” nia hateten.

Iha fatin hanesan, Prezidente Autoridade Munisipál Bobonaro, ne’ebé reprezenta hosi asesór, José da Cruz, agradese ba Governu tanba iha situasaun pandemia Covid-19, bele hamosu programa edukativu ne’ebé bele apar ho situasaun rai laran.

Nia husu ba diretór no koordenadór eskola-sira atu aproveita oportunidade ne’e ho di’ak, nune’e bele prepara estudante-sira nia futuru.

Programa ne’e bele asesu liu hosi kanal Youtube, TV no rádiu komunidade sira ho maneira bele asesu tuir telemóvel, tableta no mós komputadór, kanál TV asesu iha GMN TV, RTTL,E.P no TVE tuir oráriu ne’ebé iha.

Alvu hosi programa edukasaun ba uma maka, estudante-sira hosi Pré-eskolár no Ensinu Báziku Siklu datoluk no daruak, programa Tele-eskola nia alvu maka estudante-sira hosi siklu datoluk to’o sekundária.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here