TDD. Imajen Tatoli /Dok

DILI, 30 setembru 2021 (TATOLI)—Tribunál Distritál Dili (TDD), husu atu halo ezame médika ba arguidu ho inisiál AGC, tanba la hatene ko’alia atu hatan ba krime omesídiu ho forma tentada.

Juíz prezide Ivan Suritai, hateten liuhosi inísiu julgamentu katak, Tribunál difísil iha komunikasaun ho arguidu tanba labele ko’alia ka defisiénsia ho tipu mudo.

Notísia relevante:TDD kontinua rona sasin ba kazu administrasaun danoza iha MEJD

Tuir informasaun hosi arguidu nia-aman katak, bainhira arguidu seida’uk halo problema ko’alia hela, foin mak monok tiha no la ko’alia to’o agora.

“Iha uma família ko’alia ho nia komprende hela, hanesan bolu atu ba han. Tanba ne’e atu hatene kondisaun loloos, Tribunál solisita hodi halo teste médika,” Ivan Suritai, pronunsia iha sala audiénsia TDD, Mandarin, kinta ne’e.

Tribunál husu ne’e tuir artigu 83 iha kódigu prosesu penál kona-bá interpretasaun ninia nomeasaun iha alinea b, hateten kuandu ema ho defisiénsia ne’ebé la hatene lee, hakerek no labele ko’alia, tenke fó deklarasaun.

Tuir faktu katak, iha 04 juñu 2020 tuku 18:40 iha rezidénsia, aldeia Maumetalau, suku Maumeta, postu administrativu Bazartete, munisípiu Liquiça, arguidu lori tudik sona lezadu J nia hirus matan ho kalilin hun, hodi rezulta kanek, kuak no ran-sai.

Família ba hala’o tratamentu iha sentru saúde Liquiça, no kontinua transfere ba Ospitál Nasionál Guido Valedares (HNGV, sígla portugés).

Konsekuénsia hosi hahalok arguidu nian, lezadu hetan kanek, kuak iha hirus-matan ho medida sentimetru tolu no mós kanek iha kalilin hun parte loos.

Kona-bá akuzasaun kompletu, Tribunál seidauk lee-sai hodi hein julgamentu iha 09 dezembru 2021 iha tuku 10:00 otl.

Ministériu Públiku akuza arguidu ho krime omesídiu ho forma tentada previstu iha artigu 138, 23, 24 kódigu penál.

Iha artigu 138 omisídiu simples, deskreve katak, ema ne’ebé oho ema seluk sei hetan pena prizaun tinan 8 to’o tinan 20.

Artigu 23 tentativa, tentativa iha kuandu ajente hahú ezekusaun iha krime ne’ebé nia hola tiha ona desizaun atu halo, no halo, hotu ka balun de’it, aktu sira-ne’ebé objetivamente bele prodús nia rezultadu no rezultadu ne’e la mosu tanba de’it sirkunstánsia ne’ebé laiha relasaun ho ajente nia vontade.

Artigu 24 tentativa nia punibilidade, iha alinea 1 hateten iha krime dolozu ne’ebé bele fó-fatin ba pena prizaun ho limite másimu as-liu tinan tolu no iha kazu ne’ebé lei determina maka tentativa bele fó-fatin ba punisaun no alinea 2.

Audiénsia ne’e prezide hosi koletivu juiz, MP reprezenta hosi prokuradór Nelson de Carvalho no arguidu hetan asisténsia legál hosi Defensór Públiku, Rui Guterres.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here