Diretór Jerál Obra Públika, Rui Hernani. Imajen TATOLI/Florêncio Miranda Ximenes

DILI, 30 setembru 2021 (TATOLI)—Konsellu Administrasaun Fundu Infraestrutura (KAFI) aprova ona Dezeñu Enjeñeiru Detalladu (DED) ba projetu hamutuk 13, hosi Ministériu Obra Públika ne’ebé nia alokasaun orsamentu iha Fundu Infraestrutura Orsamentu Jerál Estadu (OJE) 2021.

“KAFI aprova dezeñu detaladu ba projetu infraestrutura hamutuk 13, atu fó biban ba  Komisaun Nasionál Aprovizionamentu (CNA, sigla portugés) loke konkursu públiku hodi hetan manan-na’in, bele konstrui no rekupera ona infraestrutura estragu balun, kauza dezastre naturál ne’ebé akontese iha loron 04 abríl,” Diretór Jerál Obra Públika, Rui Hernani, hateten, ba Agência TATOLI, iha knaar fatin, kinta ne’e.

Notísia relevante: Reuniaun KAFI diskute planu rekuperasaun infraestrutura impaktu dizastre naturál

Tuir Diretór Jerál ne’e, estudu Dezeñu detalladu ne’e hala’o ona hosi konsulta sira iha tinan 2019 no orsamenta ona iha orsamentu tinan ne’e, ba projetu iha munisípiu Ainaro, Liquiçá, Covalima, Bobonaro, Lautém, Manufahi, Baucau, Manatuto,Viqueque, Ermera no Dili.

KAFI aprova DED, kompostu hosi estudu dezeñu enjeñeiru estrada urbana no munisípiu hamutuk sia, morru protesaun mota no ponte hamutuk tolu no projetu emerjénsia ba konstrusaun estrada protesaun down stream ponte CPLP bá Bebonuk ne’ebé hetan estragu tanba dezastre naturál foin lalais.

Estudu ba estrada urbanu iha munisípiu Ainaro ho kilómentru 20, Liquiçá ho kilometru 20, no dezeñu detalladu preparasaun reabilitasaun estrada ligasaun munisipál hosi Beco bá Lolotoe (Covalima-Bobonaro) ho kilómentru 26,7.

Nune’e mós, dezeñu detalladu ba preparasaun reabilitasaun liga munisípiu  Mehara (Lautém) ho Kilómetru 20,7, reabilitasaun estrada estrada munisipál hosi Natarbora-Betano, Same Luak-Betano ho kilómetru 10 no Dotik-Fatuberlihu to’o Alas ho kilómentru 16,25.

Reabilitasaun estrada munisipál hosi Flamboyang bá Caibada ho kilómetru 10, Baguia bá Bahatata to’o postu tuan Uatocarbau ho kilómentu sia inklui ponte hosi Truss to’o Gleno Villa ho kilómetru 6,4, reabilitasaun estrada Jct Oeleu-Lourba-ZuloFatuleku ho kilómetru 26,7 no Maliana bá Atabae ho kilómetru 8,72.

Estudu DED ba reabilitasaun estrada Hatuudo ba Ainaro ho kilómetru 25,02 no reabilitasaun estrada hosi Baguia to’o Uatocarbau ho kilómentru 38,07.

Dezeñu detalladu morru protesaun no ponte ezistente hanesan fronteira Mota-ain Batugade, Nunura – II Bobonaro, Loes- Liquiçá, Nunura-I Bobonaro,  morru protesaun ba mota Comoro iha ponte Hinode, estudu DED ba  mortu protesaun mota Lacló villa-Manatuto, Bemori-Dili, Welolo, Vemasse, Wekain Irabere no Dilor no DED ba morru protesaun Lutumutu-Ermera, Sare- Hatulia, mota ejisten Suai no Lomea.

Aliende ne’e, konstrusaun foun morru protesaun no estrada iha Ponte CPLP ba Bebonuk-Dili.

“Kona-ba hala’o rekuperasaun estragu infraestrutura kauza dezastre naturál, ita-nia Vise-Ministru Obra Públika asina kontratu ona ho kompañia haat, atu rekupera lokál haat hanesan Bidau, Tibar, morru sustentasaun Maloa, ponte kiik-oan iha Ailok-laran,” Diretór Rui Hernani informa.

Notísia relevante: MOP kontrata kompañia haat rekupera estragu infraestrutura kauza dezastre naturál

Ekipa task force identifika ona lokál estragu infraestrutura kauza dezastre naturál iha loron 04 abríl hamutuk 94, ne’ebé hatudu iha estrutura simples estragu pur volta lokál 54 no estrutura komplexu hamutuk 40-resin.

Daudaun ne’e, MOP hamutuk ekipa task force halo ona preparasaun hodi halo dezeñu detalladu hodi rekupera.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here