Edifísiu uma mahon Knua Haberan Komunidade (KHK), munisípiu Viqueque. Imajen Tatoli/Vitorino Lopes da Costa.

VIQUEQUE, 30 setembru 2021 (TATOLI)—Hahú fulan janeiru to’o setembru, uma mahon Knua Haberan Komunidade (KHK), munisípiu Viqueque rejista hodi asegura vítima ho tipu oioin hamutuk na’in 64.

“Uma mahon Viqueque nunka mamuk, iha tinan 2021 ita simu vítima na’in 64. Ita halo akompañamentu ba sira-nian prosesu tomak, hodi asesu ba polísia, Ministériu Públiku, ezaminasaun fíziku no tribunal,” Koodenadora uma mahon KHK, Cristona Rosawati Gusmão, informa ba jornalista iha Boromatan, Viqueque Vila, kinta ne’e.

Notísia relevante:Uma Mahon Salele fó mahan ba vítima violénsia sira

Hosi dadus 64, na’in 23 iha ona Ministériu Públiku, Tribunál na’in ida no na’in 40 mak uma mahon entrega ba Sentru Solidariedade Munisípiu Viqueque atu re-intrega vítima-sira ba fali família-sira.

Tipu vítima mak hanesan, violénsia doméstika na’in 40, violénsia seksuál na’in 19, insestu na’in-tolu, ameasa na’in-ida, abandona na’in-ida.

Tuir dadus, desde estabelesimentu uma mahon Viqueque iha 2015, to’o 2021 simu ona vítima hamutuk na’in 313.

Vítima hirak ne’e ho tipu kazu hanesan violénsia doméstika na’in 136, violénsia seksuál na’in 95, insestu na’in-10, tráfiku umanu na’in-tolu, violénsia psikolójika na’in-haat, asaltu fíziku na’in-tolu, abuzu fíziku na’in-tolu, ameasa na’in-hitu.

Hosi númeru ne’e mós iha ema ho defisiénsia na’in 24, no ema normál na’in 289.

“Ami enfrenta dezafiu liuliu transporte, tanba iha matadalan hateten kuandu evakua vítima labele tula ho motorizada, maibé ami transporte. Entaun ami dala ruma tula vítima-sira iha motorizada hodi asegura lalais,” nia hateten.

Durante ne’e uma mahon hato’o ona proposta ba Governu no parseru internasionál-sira, maibé seidauk iha resposta ruma hodi apoiu transporte.

Maski serbisu iha uma mahon ne’e ho risku boot, maibé pesoál sira kontinua hala’o serbisu tanba vokasaun atu tulun maluk sira.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here