Finalista ICR São Tomas de Aquino tuir graduasaun, iha salaun Catedral, kinta (30/09). Imajen TATOLI/Francisco Sony

DILI, 30 setembru 2021 (TATOLI)–Estudante finalista na’in-80, kompostu hosi Fakuldade Formasaun Profesór Morál no Relijiaun Katólika na’in-63 no Fakuldade Servisu Sosiál na’in-17, iha kinta ne’e, gradua hosi Institutu Siénsia Relijioza (ICR, sigla portugés) São Tomas de Aquino.

Reitór ICR, Padre Crisostomo I. Salar. Jr, konsidera maski hasoru obstákulu boot bainhira nasaun tama situasaun pandemia, maibé konsege forma finalista sira to’o hetan graduasaun.

Finalista ICR São Tomas de Aquino tuir graduasaun, iha salaun Catedral, kinta (30/09). Imajen TATOLI/Francisco Sony

“Ita konsidera abilidade no kapasidade graduadu sira, ne’ebé sai sasukat ba ICR iha tinan-ida ne’e hodi deside graduasaun. Ita fó parabens ba esforsu sira,” Reitór Crisostomo, hateten, iha seremónia graduasaun oitavu turnu ICR nian, iha salaun Katedrál Villa-verde, kinta ne’e.

Graduasaun ne’ebé akontese ona ba estudante finalista ho grau akadémiku lisensiatura no baxarelatu 80, la’ós de’it esforsu institutu nian, maibé esforsu ema hotu nian inklui graduandu sira.

Finalista ICR São Tomas de Aquino tuir graduasaun, iha salaun Catedral, kinta (30/09). Imajen TATOLI/Francisco Sony

Nia dehan, graduasaun ne’e nu’udar pasu ida atu re-integra hikas estudante sira ba komunidade.

“Buka atu halo di’ak liután no kontinua kapasita-an nafatin atu sai estudante ka sidadaun ida nakonu ho kapasidade, koñesimentu no abilidade. ICR sei orgullu bainhira haree ninia oan sira sai figura importante iha komunidade nia le’et. Ita hein rezultadu saida maka estudante oitavu turnu sira sei oferese ba instituisaun ida-ne’e,” nia subliña.

Iha biban hanesan, Graduadu Ana de Fátima, hosi Fakuldade Formasaun Profesór Morál no Relijaun Katólika, dehan, institutu ne’e sai nu’uar uma-mahon daruak ba sira, tanba ICR mak hakonu ona estudante sira ho siénsia no multidimensaun relijiaun no morál atu dezenvolve vida umana.

Tuir Ana de Fátima, ICR  halo ona ema sai parseiru Maromak nian.

Finalista ICR São Tomas de Aquino tuir graduasaun, iha salaun Catedral, kinta (30/09). Imajen TATOLI/Francisco Sony

“Tanba uma edukasaun ne’e dinámiku no móvel, edukasaun ne’e moris tanba eduka ema moris, ema ne’ebé Maromak nia imajen rasik. Edukasaun ne’e moris tanba Maromak eziste iha ema-nia moris no halo ema sai parseiru Maromak nian,” nia akresenta.

Nia dehan, ICR hatudu ona plataforma politíka aprendijazen, hodi hametin relijiaun morál sai abut no hu’un ba prosesu aprendijazen hotu, katak relijiaun morál mak hatudu siénsia ho naroman lolos.

“Ne’e duni ami sira ne’ebé simu ona graduasaun ne’e kompromete sei kuidadu almamater ICR nian hodi hamorin nafatin iha sosiadade nia le’et,” graduadu ne’e kompromete.

Jornalista : Tomé Amado

Editora      : Julia Chatarina

HAKEREK NO HATÁN

Please enter your comment!
Please enter your name here