Ministru Prezidénsia Konsellu Ministru, Fidelis Manuel Leite Magalhães, lansa kampaña vasinasaun kontra COVID-19, iha suku Lahomea, postu administrativu Maliana, munisípiu Bobonaro, kinta (30/09/21). Imajen Tatoli/ Sérgio da Cruz.

BOBONARO, 30 setembru 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, ofisialmente halo lansamentu no  sosializasaun ba kampaña vasinasaun kontra COVID-19, iha suku Lahomea, postu administrativu Maliana, munisípiu Bobonaro.

“Loloos ne’e la’ós ha’u-nia kompeténsia, maibé iha asuntu kona-bá vasina importante teb-tebes atu ha’u mai ko’alia, tanba ha’u rona iha Lahomea inan-aman no alin-sira idade elijível la ba vasina,” nia hateten iha sede suku Lahomea, kinta ne’e.

Notísia relevante:Vasina 80%, MEJD hato’o parabens ba serbisu edukasaun Bobonaro

Governante ne’e esplika, durante períudu COVID-19, Governu esforsu atu salva populsaun ho maneira implementa vasina, nune’e bele aumenta imunidade isin hodi luta kontra virus ne’e, no laiha intensaun atu estraga.

“Hanesan imi-nia oan no beia oan, Bobonaro oan, boot iha ne’e kedan, iha ha’u-nia istória la hanoin atu oho imi ho ai-moruk aat. Tanba ne’e, ohin ha’u mai direta ko’alia ho imi atu hateten saida mak halo imi tauk ita bele buka solusaun hamutuk,” nia akonsella.

Iha fatin hanesan, komunidade Lahomea, Esteves Barreto, rekoñese partisipasaun populasaun atu vasina menus, tanba informasaun ofisiál-sira ne’ebé membru Governu publika iha média nasionál la balansu.

“Nai ulun sira iha leten ba ko’alia liafuan ne’e mesak furak, dehan katak ema ne’ebé kompleta ona segunda doze bele la’o livre, maibé realidade la’e. Ho infromasaun sira ne’e mak ema lakohi mai simu vasina,” nia dehan.

Maski nune’e, nia mós agradese ba Ministru Fidelis tanba bele tun direta hodi fahe informasaun hodi motiva atu simu vasina.

Nune’e mós Xefe Suku Lahomea, Cirilio Mau Leto, konsidera vasina importante atu peoteje an hosi transmisaun COVID-19.

Nia observa katak, durante ne’e populasaun barak seidauk simu vasina, tanba fiar liu boatus, maibé autoridade lokál ne’e promete sei esforsu konvense populasaun, atu bele haka tba postu vasinasaun.

Populasaun iha suku Lahomea kompostu hosi aldeia, Galisapulu, Lahomea, Hatu Laca no Genu, ne’ebé alvu atu simu vasina hamutuk 2.777.

Hosi númeru ne’e 1.006 mak simu ona doze dahuluk, doze kompletu 306, enkuantu populasaun ne’ebé seidauk simu vasina hamutuk 1.006

Membru Governu responsável ba kampaña vasinasaun iha munisípiu Bobonaro mak hanesan, Ministru Prezidénsia Konsellu Ministru, Fidelis Manuel Leite Magalhães.

Responsável postu administravu Maliana no postu administrativu Bobonaro maka, Ministru Edukasaun Juventude no Desportu, Armindo Maia.

Iha postu administrativu Cailaco mak Ministru Ensinu Superiór Siénsia no Kultura (MESSK), Longuinhos dos Santos no postu administrativu Balibo ho Atabae sei responsabliza hosi Ministru Agrikiltura no Peska (MAP) Pedro dos Reis.

Governante hirak ne’e sei hala’o kampaña vasinasaun iha suku 50, durante semana rua nia laran ho objetivu atu konsola komunidade hodi kontribui hasa’e kobertura vasina iha Bobonaro.

Tuir dadus, populasaun iha Munisípiu Bobonaro ne’ebé simu ona vasina doze primeiru 42,5% no doze kompletu hamutuk 15,2%.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here