Box ne’ebé utiliza ba konstrusaun ponte iha área Larigutu, kinta (30/09/21). Imajen Tatoli/Vitorino Lopes da Costa.

VIQUEQUE, 30 setembru 2021 (TATOLI)—Autoridade munisipál Viqueque kestiona kualidade konstrusaun ponte iha área Larigutu, tanba tuir observasaun katak, kompañia implementadór Uacae utiliza besi ho medida kiik liu ba konstrusaun.

“Ami autoridade postu administrativu Ossu la satisfas ho estrada ne’ebé kategoria nasionál, maibé  kompañia Uacae halo konstrusaun ba ponte ne’e uza de’it besi ho medida mili 12. Projetu ne’e laiha kualidade, no bainhira karreta tula sasan todan ponte bele monu, ita gasta osan de’it,” Adiministradór postu administrativu Ossu, Agustinho de Sousa, hateten ba jornalista iha salaun Viqueque, kinta ne’e.

Autoridade ne’e mós kestiona katak, Governu anteriór konstrui estrada hosi Venilale to’o Viqueque, kontrata kompañia hosi Xina, maibé tanba saida mak derrepente kompañia Uacae mak kaer fali.

Bainhira Governu la halo intervensaun ba estrada no ponte sira ne’ebé implementa hosi kompañia Uacae, maka autoridade sei halo impedimentu, tanba haree ba konstrusaun fíziku ne’ebé laiha kualidade.

Nune’e mós administradór munisípiu Viqueque, Januário Soares Bolly, hateten,besi ne’ebé agora kompañia Uacae uza ba ponte ne’e tuir loloos labele tanba medida besi ki’ik liu.

“Ha’u mós haree ona besik ne’ebé kompañia Uacae uza ne’e ki’ik liu. Ha’u-nia uma de’it mós uza besi boot, sa tan ponte ne’e loloos tenke uza besi boot,” Bolly hateten.

Kona-bá asuntu ne’e, Diretór Serbisu Ministériu Obras Públika (MOP) Viqueque, Mário do Rego, hateten materiál sira ne’ebé kompañia uza ba ponte hetan aprovasaun hosi nasionál no kompañia-sira implementa de’it.

“Projetu estrada ne’ebé implementa hosi kompañia Uacae, antes ne’e hetan ona aprovasaun ba materiál hosi parte MOP rasik. Box ne’e kompañia utiliza besik mili 16 la’ós mili 12,” Mário do Rego esplika.

Hatan kona-bá preokupasaun ne’e, enjeñeiru kompañia Uacae, Marito Baptista, esplika antes implementa projetu MOP rasik mak entrega dezeñu ba kompañia.

“Agora daudaun ami halo ne’e la’ós ponte, maibé ne’e box. Ami mós halo uluk ona pakote dahuluk iha área Asa-Laitula sa’e mai Larigutu nian, agora karreta halai iha leten la monu. Ami uza besi mili 16 mak halo box ne’e tuir padraun hosi MOP,” Marito Baptista  hateten.

Konstrusaun ba box ne’e lu’an metru tolu, mahar centimo 30, no naruk metru tolu, kontrusaun ne’e uza besi mili 16.

Projetu estrada ne’ebé kompañia lokál Uacae implementa hamutuk kilómetru neen-resin ho montante orasamentu ba projetu hamutuk millaun $4-resin.

Jornalista: Vitorino Lopes da Costa

Editór: Cipriano Colo

2 KOMENTÁRIU

  1. Kompania neebe halo Box nee nia kalkulasaun ba estrutura tenki iha; No husu ba konsultan supervisao; ADN ou MOP tenki haree no analiza ho didiak atu nunee labele akontese failansu.

  2. karik aban bainrua ita hare kualidade estrada asalaitula ho viqueque sei lahanesan liliu nia kualidade tanba kompha lokal hakarak lolos ne’e fo kompanhia xina mak kaer karik parte mop bele esplika ba publiku tanba saida mak kompanhia lokal mos bele kaer obra ida ne’e no ninia prosesu kleur liu

HAKEREK NO HATÁN

Please enter your comment!
Please enter your name here