Prezidente Autoridade Nasionál Komunikasaun, João Olívio Freitas. Imajen TATOLI/Francisco Sony

DILI, 30 setembru 2021 (TATOLI)—Autoridade Nasionál Komunikasaun (ANC, sigla portugés) hahú prepara proposta-lei ba mudansa díjitu numerasaun telemóvel no regra rejistrasaun domíniu site (domain site), ne’ebé tempu badak sei halo konsultasaun públika.

Tuir Prezidente ANC, Joaõ Olívio Freitas, konsultasaun ne’e ho tema ‘planu númerasaun no enderesu ANC’, ne’ebé sei hala’o durante durante semana-ida, hahú loron 30 setembru to’o 05 novembru tinan ne’e, hodi envolve operadór telekomunikasaun hanesan Timor Telecom, Telkomcel, Telemor no entidade relevante sira.

“Ami lansa tan konsutasaun públika ba planu númerasaun no enderesu ANC. Proposta ne’ebé halo hodi aprezenta iha planu  númerasaun telemóvel. Númeru díjitu atuál ba servisu telemóvel iha ualu, ita sei aplika hanesan mós pur ezemplu díjitu hitu ba telemóvel, ne’ebé sei iha mudansa, nune’e mós mudansa ba númeru servisu telemóvel ho díjitu 331,” Prezidente ANC Joaõ Olívio Freitas, informa liuhosi konferénsia imprensa, iha salaun ANC, Caicoli, kinta ne.

Nune’e mós, autoridade ne’e iha proposta atu halo mudansa ba rejistrasaun domíniu site.

“Ita-boot sira hatene, kuandu rejistu domain ezemplu, http://www.anc.tl/, ba oin iha proposta-lei ne’ebé daudaun ANC iha, sei iha regra foun balun,” nia akresenta.

Tuir Prezidente ANC, númeru servisu telemóvel no domíniu site ne’ebé daudaun autoridade atribui ba operadór tolu, nu’udar rekursu Estadu nian, tanba ne’e presiza halo mudansa.

Iha proposta ne’e, sei introdúz mós aplikasaun taxa ba utilizasaun númeru telemóvel fixu no atribuisaun domíniu site.

“Ita tau kedan nia presu iha dokumentu ne’e nia laran,  durante ne’e ita seidauk introdúz taxa ida atu aplika ba utilizasaun servisu telemóvel, liga ba númeru telefone no domíniu site, ne’ebé kada tinan operadór sira selu $0,25, nune’e bele konstribui ba reseita Estadu,” nia akresenta.

Jornalita : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here