Pontu fokál Komisaun Jestaun Risku Dezastre, munisípiu Bobonaro, Armindo Vicente. Imajen Tatoli/ Sérgio da Cruz.

BOBONARO, 29 setembru 2021 (TATOLI)—Komisaun Jestaun Risku Dezastre (KJRD) munisípiu Bobonaro, rejista vítima afetadu dezastre naturál hamutuk  316.

Pontu fokál Komisaun Jestaun Risku Dezastre, munisípiu Bobonaro, Armindo Vicente, hateten vítima barak liu mai hosi postu administrativu Bobonaro no Cailaco, tanba postu administrativu rua ne’e hanesan fatin risku ba anin.

Notísia relevante:SEPS fó apoiu nesesidade bázika ba vitima dezastre naturál

“Ita rekolla ona dadus iha tinan 2021, inklui akontesimentu iha 04 abríl, ho totál 150 no foin lalais ne’e ami rejista tan vítima 166,” Armindo Vicente, informa ba jornalista iha kna’ar fatin, kuarta ne’e.

Dadus hirak-ne’e Komisaun Jestaun Risku Dezastre, munisípiu Bobonaro, relata ona ba Diresaun Nasionál Risku Dezatre, ne’ebé hamahan an iha Sekretáriu Estadu Protesaun Sivíl (SEPS) atu halo prosesu.

Tuir prosesu normál, material kontrusaun hotu sentraliza iha Dili, entaun prosesu hotu la’o ona, agora hein de’it informasaun hosi Diresaun Nasional ba prosesu distribuisaun.

Maski vítima hirak-ne’e seidauk hetan apoiu materiál konstrusaun hosi Governu liu hosi Sekretáriu Estadu Protesaun Sivíl, maibé kona-bá apoiu emerjénsia ba nesesidade bázika, komisaun halo ona distribuisaun bazeia ba dadus ne’ebé iha no pedidu ne’ebé autoridade lokál ho komunidadel sira relata.

Materiál emerjénsia ho tipu Food item hanesan fo’os, buiskuit no sasan sira-seluk, no non food item hanesan bikan, kanuru, kopu no lona.

Durante levantamentu dadus, Komisaun Jestaun Risku Dezastre Bobonaro mós sempre enfrenta problema hanesan, menus fasilidade transporte, liu-liu rekursu umanu, tanba daudaun ne’e  pontu fokál na’in-ida de’it mak halo serbisu, nune’e difísil atu kobre to’o aldeia 193 suku 50 no postu administrativu neen.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here